खोज

दाङ, २६ पुस ।

मान्छेका रहर पनि थरीथरीका हुन्छन् । यस्तै रहर पुरा गर्न घोराही उपमहानगरपालिका– १६ का खिरटियाका भोलाप्रसाद श्रेष्ठले पशु पक्षी पालेर आफ्नो रहर पुरा गरेका छन् । उनका घरका वरीपरी फाइटर कुखुरा, हाँस, परेवाले ढाकेका छन् । १५ वर्षअघि दुइवटा कुखुराबाट सुरु गरेका भोलासंँग अहिले ४० वटा कुखुरा, १५ हाँस र ८० परेवा छन् । जम्मा एक सय ३५ चराचुरुङी छन् ।

घर नजिकैको वनमा वन हेरालु पदमा काम गरेका भोलालाई चराचुरुङीको धेरै माया लाग्ने बताए । कृषि र पशुपंक्षी पालनमा रमाएका भोलाले घरमा उत्पादन हुने दाना खुवाएर पंक्षी पाल्ने गरेको बताए । घर भरी हाँस, कुखुरा, परेवा र बाख्रा देख्दा आनन्द लाग्ने उनी बताउँछन् । रहरले पालेका फाइटर (लडाकु) कुखुरा घरभरी भएका छन् । कुखुराका बच्चा घरमै उत्पादन गर्ने गरेको उनले बताए । धेरै ठूलो लगानी नगरी र घरमै उत्पादन भएको धान र मकैको दाना खुवाएर पाल्न सजिलो भएको छ । उनीसँग ६ वटा खसी पनि छन् । कृषि पेसामा लाग्दा समय गएको पनि पत्तो नहुने र आम्दानी पनि प्रशस्त भएको उनको भनाई छ ।

लक्का, गरीराज, लालसरा जातको परेवा पनि पालेका छन् । फाइटर कुखुरा लडाउनका लागि सौखिन मानिसले लैजाने गरेका छन् । “एउटा फाइटर कुुखुरा पाँच हजार रुपैयाँमा बिक्री गर्ने गरेको छ”–उनले भने, “हाँस, कुखुरा र परेवा बिक्री गरेर घर खर्च चलाउका साथै अलिअलि बचत पनि भएको छ ।” धेरै लगानी र दुःख नगरेर पनि राम्रो आम्दानी हुन थालेपछि यसलाई निरन्तरता दिएको उनले बताए ।

गाउँघरका युवा रोजगारीको लागि बिदेशी भूमिमा गएको देख्दा उनलाई दिक्क लागेर आउँछ । अलीकती लगानी र जाँगर ग¥यो भने यही प्रशस्त आम्दानी गर्न सकिने उनको भनाई छ ।

घोराही बजारको नजिकै रहेकाले बिक्री गर्न कुनै समस्या नभएको उनले बताए । रहरले सुरु गरेको काम व्यावसायिक भएको छ । गोठको एउटा कोठामा बाख्रा र अर्को कोठामा पंक्षी बस्ने ठाउँ बनाएर पालेको उनले बताए । कामलाई सानो ठूलो नभनी सुरु गरेमा आम्दानी लिन सकिने उनको भनाई छ । घरमा खेर गएको अनाजलाई सदुपयोग गरेर आम्दानी पनि हुने र रहर पनि पुरा भएको उनको भनाई छ ।