खोज

बुटवल, २६ भदौ । बुटवलको पुरानामध्येको एक रोटरी क्लब अफ बुटवलले १५३२ औ नियमित बैठक तथा तेस्रो क्लब एसेम्बली सम्पन्न गरेको छ । क्लबबाट भएका कार्यप्रगतिको समिक्षासंगै नया योजनाहरु बनाउने गरि क्लबका फाईभ स्ट्याडिङ कमिटिले रोटरी डिष्ट्रिक ३२९२ जोन २४ का एजी खिमानन्द पाण्डेलाई आआफनो कमिटिको प्रगति र कार्ययोजना प्रस्तुत गरे ।

कार्यक्रममा क्लब एडमिन कमिटी बारेमा प्रेसिडेन्ड नोमिनी मधु प्रसाद अर्यालले आफ्नो प्रस्तुतिमा क्लबको प्रशासनिक कार्यहरू, क्लबको संगठनात्मक संरचना, नियमित बैठकहरूको व्यवस्थापन तथा क्लबको आन्तरिक समन्वयको बारेमा जानकारी गराएका थिए । उनले क्लबलाई अझ प्रभावकारी ढंगले सञ्चालन गर्न आवश्यक रणनीति र सुधारका उपायहरूबारे चर्चा गरे ।

यसैगरि क्लब मेम्बर कमिटीका सदस्य गोपाल अधिकारीले आफ्नो प्रस्तुतिमा क्लब सदस्यहरूको संख्यामा वृद्धि, सदस्यहरूको सक्रियता तथा सहभागिता बढाउने योजना र नयाँ सदस्यहरूको स्वागत तथा समायोजनका प्रक्रियाहरूको बारेमा जानकारी गराए । क्लबका सदस्यहरूको पेशागत तथा व्यक्तिगत विकासमा सहयोग पुग्ने गरि विभिन्न प्रशिक्षण तथा क्षमता विकास कार्यक्रमहरू गर्ने, सदस्यहरू बीचको आपसी समन्वयलाई अझ सुदृढ बनाउनका लागि विभिन्न गतिविधिहरू सञ्चालन गर्ने प्रस्ताव पनि राखे ।

यसैगरि सर्भिस प्रोजेक्ट कमिटीका चेयर बसन्त थापा चर्तीले क्लबद्वारा संचालित सामाजिक सेवाका परियोजनाहरूको प्रगति विवरण प्रस्तुत गर्दै स्वास्थ्य, शिक्षा, वातावरण संरक्षण, तथा समुदाय विकासजस्ता क्षेत्रमा सञ्चालन भएका परियोजनाहरूको सफलताबारे जानकारी गराए । आगामी दिनमा समाजमा अझ ठूला र दीर्घकालीन प्रभाव पार्ने परियोजनाहरू संचालन गर्ने योजना सार्वजनिक गरे । जसमा सामुदायिक विद्यालयहरूको स्तरोन्नति, स्वच्छता अभियान, स्वास्थ्य शिविरहरू र पर्यावरणीय संरक्षणका गतिविधिहरू विशेष प्राथमिकतामा रहने कुरा उल्लेख गरे ।

यसैगरि क्लब पब्लिक इमेज कमिटीका चेयर खिम नारायण पराजुलीले क्लबको छवि र प्रतिष्ठा निर्माणका लागि भएका प्रयासहरूको बारेमा जानकारी गराए । उनले क्लबका गतिविधिहरूलाई सार्वजनिक र प्रभावकारी ढंगबाट प्रस्तुत गर्न सञ्चार माध्यम, सामाजिक सञ्जाल र विभिन्न सार्वजनिक कार्यक्रमहरूमा क्लबको सहभागिता बढाउने योजनाहरू बताए ।

यसैगरि द रोटरी फाउण्डेसन कमिटी पूर्वअध्यक्ष डा. मनोहर जोशीले रोटरी फाउण्डेशनसँग सम्बन्धित विभिन्न परियोजना, अनुदान कार्यक्रम र क्लबका सदस्यहरूको योगदानको बारेमा जानकारी गराए । उनले फाउण्डेशनको अनुदानमार्फत गरिएका परियोजनाहरूको प्रगति, आर्थिक व्यवस्थापन र समुदायमा भएको सकारात्मक प्रभावबारे बताए । फाउण्डेशनको सहायता पाउनका लागि आवश्यक प्रक्रिया, सदस्यहरूको योगदानका महत्व र आगामी परियोजनाहरूका लागि फाउण्डेशनको भूमिका बारे उनले जानकारी दिए ।

कार्यक्रममा रोटरी डिष्ट्रिक ३२९२, जोन २४ का सहायक गभर्नर (एजी) खिमानन्द पाण्डेले क्लबको प्रगति, सेवामूलक कार्यहरू र सदस्यहरूको सक्रियतालाई प्रशंसा गरे । क्लबलाई अझ बढी प्रभावकारी ढंगले सञ्चालन गर्न, नयाँ परियोजनाहरूको सुरुआत गर्न र समुदायमा सकारात्मक परिवर्तन ल्याउन सहकार्यको महत्वमा उनले जोड दिए । उनले रोटरी क्लबहरू बीचको समन्वय र आदानप्रदानलाई बढावा दिँदै क्लबलाई अझ उच्च स्थानमा पु¥याउन सबैलाई उत्साहित गरे ।

कार्यक्रममा क्लबका अध्यक्ष प्रज्वल थान्जुले क्लबका विभिन्न कमिटीहरूको प्रस्तुतिबाट क्लबको विकास र सेवामूलक कार्यहरूमा उल्लेखनीय प्रगति भएको बताए । उनले क्लबका सबै सदस्यहरूलाई सक्रिय भूमिका निभाउन प्रेरित गर्दै आगामी दिनमा पनि एकताबद्ध भएर क्लबका उद्देश्यहरू पुरा गर्न योगदान दिन आग्रह गरे । क्लबको सुदृढीकरण, सदस्यहरूको सहभागिता र समाजमा थप प्रभावकारी सेवामूलक कार्यहरू सञ्चालन गर्नका लागि दीर्घकालीन योजना र दृष्टिकोणका बारेमा चर्चा गरे ।

कार्यक्रममा क्लबका पूर्वअध्यक्ष बोनिन पिया, हरि प्रसाद पौडेल, प्रेसिडेन्ट इलेक्ट कृष्ण पराजुलीले रोटरी बुटवलबाट समाजमा उत्कृष्ट कामहरु गर्न सफल भएको भन्दै कार्यक्रमलाई थप नयापन दिने गरि लैजान सुझावहरु दिए ।