खोज

बुटवल, २८ भदौ ।
गुल्मीको दिगामका लेखनाथ बेल्बासे बुटवलमा बसेर व्यवसाय गर्न थालेको १२ बर्ष जति भयो । विदेशी भूमिमा पसिना बगाएका उनले बुटवल ८ सुख्खानगर दिप बोर्डिङ्ग अगाडी दाजुभाई डेरी सहित किराना पसल समेत सञ्चालन गर्दै आएका छन् ।

एक दिन उनी गाउँका केही दाजुभाईसंग सल्लाह भयो, गाउँको उत्पादन शहरमा बजारीकरण गर्ने । दुई दाजुभाईका विचमा सल्लाह भएपछि उनले सुरुवात गरेको पहिलो चरणमा गाउँमा उत्पादन भएको तरकारी लाई बुटवलमा बजारीकरण गर्ने ।

गाउँमा उत्पादन भएको बस्तुले बजार पाउने, अर्को तर्फ शहरका उपभोक्तालाई अर्गानिक तरकारी जन्य उत्पादन खुवाउन पाईने । सोही अनुसार उनले सुरुवात गरेको तरकारी अहिले २ बर्ष पुगेको छ । बुटवलमा अर्गानिक उत्पादन बजारीकरणको नयाँ जुक्ती निकालेका बेल्बासेले साविक पसल सञ्चालन गरेको स्थानमा लहरै मिलाएर तरकारी विक्रिका लागि राख्ने गरेका छन् । गुल्मी जिल्लाको आफु जन्मीएको स्थान दिगामको तरकारी विहान त्यहाँका दाजुभाई किसानले टिपेर गाडीमा राखिदिन्छन्, दिउँसो उक्त तरकारी उनको पसलमा आउँछ । उनी भन्छन्–‘गाउँका किसानलाई पनि आम्दानी, हामीले पनि उत्पादन विक्रि गर्न पाएका छौं । ’ उनको पसलमा गुल्मी जिल्लाको अलवा पाल्पा, अर्घाखाँची, स्याङ्जा जिल्लाका विभिन्न स्थानमा गाउँमा उत्पादन भएको तरकारी आउने गरेको छ ।

‘बिहीबार मात्रै ८० किलो बढि काक्रा आएको थियो, छिनभरमै सकियो’ उनि भन्छन् । उनको पसलमा अहिले पाल्पाको टमाटर, बन्दा गोभी, गुल्मीको काक्रा, साग, सिमी, भिन्डी, करेला, लगायतका तरकारी आएका छन् । ढोरपाटनको आलु समेत उनले बजारीकरण गर्दै आएका हुन । उनि भन्छन्–‘हामी कहाँ उपभोक्ताले मन पराएको ढोरपाटनको आलु पनि छ, अर्गानिक भएको कारण उपभोक्ताको मन जित्दै गएको छु । ’
डेरी जन्य बस्तुको विक्रि वितरण गर्दै आएका लेखनाथ बेल्बासेले तरकारीको बजार विक्रि प्रर्वद्धनमा लागेका हुन । निकट भविश्यमा अझ बढि गाउँ गाउँबाट अर्गानिक उत्पादन संकलन गरी विक्रि वितरण गर्ने योजना बनाएको उनको भनाई छ । गाउँको उत्पादन सहरका उपभोक्ताहरूलाई स्वाद चखाउनुको साथै विषादी रहित तरकारी विक्री गर्ने लक्ष्य उनको रहेको छ । यसको लागि कोल्ड चेम्बर निर्माण गरी यसलाई अगाडी बढाउने योजना उनको रहेको छ ।

केही बर्ष पहिला सहरमा नै मौरी पालन गरेर चर्चा कमाएका बेल्बासले त्यसलाई समुहमा मिलेर निरन्तरता दिएका छन् । बुटवलको मध्य सहरमा मौरी पालन गरी उनले मह समेत काडेर विक्रि गर्दै आएका थिए ।