खोज

नेपालमा मार्च महिनामा जस्तैगरी ह्वारहरती पर्यटक आगमनको रफ्तार बढ्ने हो भने नेपालको आर्थिक मन्दी अर्को बर्षसम्म समाप्तिको सम्मुख पुग्ने हुने आशा गर्न सकिन्छ । निश्चितरूपमा पर्यटक आगमनले नेपाललाई खुसी बनाएको छ । आर्थिक मन्दीको असर अझैपनि कायमै रहेको अवस्थामा जसरी पर्यटक आगमन बढेको छ, यसले पर्यटन क्षेत्रमा आशाको किरण छाएको छ । पर्यटन बोर्डका अनुसार यस वर्षको मार्चमा नेपाल भित्रिने विदेशी पर्यटक २८ दशमलव नौ प्रतिशतले बढेका छन् । नेपाल पर्यटन बोर्डका अनुसार गत वर्षको मार्च महिनाको तुलनामा यस वर्षको मार्चमा नेपाल भित्रने विदेशी पर्यटकको संख्या २८ हजार सात सय ४१ ले वृद्धि भएको हो । गत वर्षको मार्चमा कुल ९९ हजार चार सय २६ विदेशी पर्यटक नेपाल भित्रिएकोमा यस वर्षको सोही अवधिमा एक लाख २८ हजार एक सय ६७ पर्यटक नेपाल आएका छन् । मार्चमा सबैभन्दा बढी भारतीय पर्यटक आएका छन् । यसले नेपालको पर्यटन क्षेत्र कोरोनापछिको पुरानै अवस्थामा फर्किने आशा एवं विश्वास गरिएको छ । सवैभन्दा धेरै पर्यटक भारतबाट आएका छन । भारतबाट सो अवधिमा ३० हजार छ सय ९८ पर्यटक नेपाल आएका छन् । भारतको पर्यटक आगमन हरेक महिना बढ्दो क्रममा छ । अव उनीहरूको बसाई अवधी लम्ब्याउनेतर्फ पहल जरुरी छ । चिनियाँ पर्यटकको संख्या भने १२ हजार ९३ छ । सन् २०२३ को पहिलो तीन महिनामा दुई लाख २७ हजार सात सय ५५ जना विदेशी पर्यटक नेपाल भित्रिएकोमा सन् २०२४ को पहिलो तीन महिनामा तीन लाख चार हजार छ सय ९३ जना विदेशी पर्यटक नेपाल भित्रिएका छन् । जुन ३३ दशमलव ७८ प्रतिशतले बढी हो । नेपालले पर्यटन क्षेत्रलाई विदेशी मुद्रा आर्जनको भरपर्दो श्रोत बनाउन सक्छ तर त्यसका लागि नेपालले अझै मेहनत भने गर्नुपर्नेछ । त्यसका लागि सम्बद्ध पक्ष गंभीर हुनैपर्दछ ।

पर्यटन क्षेत्रबाट सम्मृद्धिको आशा जगाउने प्रमुख गन्तब्य गौतमबुद्धको जन्मस्थल लुम्बिनी पनि हो । कोरोनाका कारण विगत तीनबर्ष थलापरेको भगवान गौतमबुद्ध जन्मस्थल लुम्विनीको पर्यटन क्षेत्र विस्तारै माथि उठ्न थालेको छ । लुम्विनीमा अहिले भारतीयदेखि तेश्रो मुलुकका पर्यटकको चहलपहल बढेको छ । पर्यटक आगमनको सिजन भएकोले पनि लुम्विनीमा पर्यटन क्षेत्रले आशा जगाएको छ । तर, लुम्बिनी आउने पर्यटकहरू अधिकांश लुम्बिनीभित्रका विहार र गुम्बामा बस्दा होटल व्यवसायी भने मारमा परेको गुनासो छ । यो बिषयमा लुम्विनीका पर्यटन व्यवसायीले थालेको आन्दोलन सहमतिमा टुंगिएको छ । अव होटल व्यवसायीको माग पूरा हुनुपर्दछ । अर्बौ लगानी गरि खुलेका होटल व्यवसायमाथि धराप हुने खालको कुनैपनि कृयाकलाप हुनुहुँदैन । लुम्बिनीभित्रका गुम्बा र बिहारमा पर्यटक बस्दा बाहिरका होटल व्यवसायी धरापमा परेका छन । त्यसै त कोरोनाका कारण पर्यटक आगमन कम हुँदा समस्यामा परेका लुम्बिनीमा होटल व्यवसायी बिहार र गुम्बाका कारण झनै समस्यामा पर्ने अवस्था आउन नदिन होटल व्यवसायीले गरेको आन्दोलनको सम्बोधन हुनेगरी लुम्बिनी विकास कोषले बिहार र गुम्बामा पर्यटक राख्ने काममा रोक लगाओस् । लुम्बिनीजस्तै अरू पर्यटन क्षेत्रको विकासमा पनि सरकारको आँखा पुगोस् ।