खोज

बुटवल–नारायणगढ सडक निर्माणमा चरम लापरवाही र ढिलाई भैरहेको बेला दाउन्ने पूर्वको ५० किलोमिटर सडक कालोपत्र सम्पन्न भएको छ । यसबाट अब निर्माण व्यवसायीले प्रतिवद्धता गरे अनुसार काम गरेमा थपिएको म्यादको केही महिना पर भएपनि सडक निर्माणको काम सम्पन्न हुने विश्वास सिर्जना भएको छ । पूर्वी खण्डको गैंडाकोटबाट दाउन्नेसम्मको ६३ किलोमिटर खण्डमध्ये एकतर्फको ५० किलोमिटर सडक कालोपत्र सकिएको छ । अव सो खण्डको करिव १३ किलोमिटर सडक कालोपत्रे गर्न बाँकी छ । आयोजनाका अनुसार आउँदो बर्खा अगाडि नै बाँकी १३ किलोमिटर सडकसमेत कालोपत्र गर्ने लक्ष्य अनुसार काम भइरहेको छ । दाउन्ने खण्डमा यात्रा गर्दा सास्ती खेप्नु परेकाले यो क्षेत्रमा चार किलोमिटर र घुमाउरो घुम्तीमा चार किलोमिटर सडक वर्षाअघि नै ढलान गरिने योजना रहेको छ । यो सडक खण्डले ढिलै भएपनि केही आशा जगाएको छ । निर्माण व्यवसायीले चाहेमा कुनैपनि आयोजना निर्धारित मितिमै सम्पन्न हुन्छ भन्ने यो एउटा सन्देश पनि हो । वि.सं. २०७५ माघमा सम्झौता भएर २०७९ साउनमा सडक विस्तारको काम सम्पन्न गर्नेगरी काम अघि बढाएपनि निर्माणमा ढिलासुस्ती हुँदा कूल ११३ किलोमिटर सडक अहिलेसम्म आधापनि कालोपत्रे हुन नसक्नु दुःखको कुरा हो । यो सडकमा भैरहेको निर्माण ढिलाईले नेपालको विकास आयोजनाको काम कसरी कछुवा गतिमा छन भन्ने कुरा चरितार्थ हुन्छ । बुटवल नारायणगढ सढक खण्डको निर्माणमा भएको लापरवाहीले त्यस क्षेत्रका जनता विगत ५ बर्षदेखि चरम पीडामा बाँच्न विवस छन् । स्थानीय जनताले थुप्रैपटक सडक बन्द गरे ।

आन्दोलनको आँधीबेहरी सिर्जना गरे तर सडक निर्माणको काम कछुवा गतिमा भैरहेको थियो । अहिले थोरै आशा जागेको छ । निर्माण सम्बद्ध कम्पनीले कामको गति बढाएको छ । अव यो सडक दुईपटक थपिएको समयभित्र त बन्न सक्दैन तर धेरै काम सम्पन्न भएपनि खुसी मान्नुपर्ने छ । ठूला आयोजनामा नेतादेखि मन्त्रालयका सचिव र आयोजना प्रमुखको समेत मिलेमतो हुने गरेको आरोप लाग्दै आएको छ । आयोजनाको समय लम्ब्याउँदा लागत बढ्ने र लागत बढ्दा सवैतिर कमिसन बढ्ने चक्करमा निर्माणको काम समयमै सम्पन्न नहुने व्यापक गुनासो छ । यो सडकमात्रै होइन, यस्ता धेरै सडक उदाहरण छन् जसको लागत बढाउने नाममा निर्माणमा ढिलाई हुने गरेको छ । बुटवलको बेलबासदेखि रूपन्देहीकै मायादेवी गाउँपालिकाको बेथरीसम्मको कूल २१ किलोमिटर सडक चार लेनमा विस्तारका लागि २०७३ साल असारमा ठेक्का सम्झौता भई काम अघि बढेको थियो । चार लेन सडक निर्माणका लागि तीन प्याकेजमा गरी एक अर्ब ६७ करोडमा ठेक्का भएको हो । जस अनुसार दक्षिणतर्फका दुईवटा प्याकेजको काम सम्पन्न भइसकेको छ । तर, उत्तरतर्फको बेलबासदेखि बेतहानी खण्डको आठ किलोमिटर सडक निर्माणको काममा भने निर्माण व्यवसायीले लापरवाही गर्दा निर्माणको काम अझै हुन सकेको छैन् । २१ किलोमिटर सडक निर्माण सम्पन्न गर्न आठ बर्ष लगाउँदा पनि पूरा नहुनुका पछि जिम्मेवार को छ ? यो सडकमा पनि लागत बढाएर कमिसन पाउने लोभ हो कि भन्ने प्रश्न उत्पन्न भएको छ । सडक निर्माणको काम छिटो गर्न स्थानीयले संघर्ष समिति समेत गठन गरे तर अवस्था जहाँको तहीँ छ । अव बेलबास बेथरी सडक क्षेत्रका प्रभावित स्थानीय जनताले जस्तै गरि अन्य सडक क्षेत्रका जनताले समेत दवाव बढाउनु जरुरी छ । बुटवल नारायणगढ सडक खण्डका स्थानीयले सडक समयमै सम्पन्न गर्न दवाव दिने उद्देश्यले दवाव नदिएको भए उक्त क्षेत्रको सडक निर्माणको काम अहिले यो अवस्थामा पुग्ने थिएन । तसर्थ अव सडक निर्माणमा स्थानीय जनताको अनुगमन र खबरदारी जरुरी छ । बुटवल नारायणगढ सडक खण्डको जस्तै निर्माणधीन रहेका तर समयमै सम्पन्न नभएका सडक निर्माणमा पनि स्थानीयको अनुगमन, खबरदारी, दबाब अत्यावश्यक छ ।