खोज

बुटवल, २६ चैत । लुम्बिनी प्रदेश भलिबल संघको विशेष साधारण सभा मंगलबार बुटवलमा सम्पन्न भएको छ । विशेष साधारण सभाले योग गुरुङलाई अध्यक्ष तथा सचिव नवल गुरुङलाई महासचिवको जिम्मेवारी दिएको छ ।

कार्यक्रमको प्रदेश खेलकुद परिषद लुम्बिनीका सदस्यसचिव तिरणध्वज गौतमले उद्घाटन गर्दै खेल क्षेत्रमा बजेट अभाव हुदा पूर्वाधार विकासमा गति लिन नसकेको बताए । देशको बजेटको कुल रकममध्ये ०.१७ प्रतिशत तथा प्रदेशको कुल बजेटको ०.१६ प्रतिशतमात्र खेलकुदमा रहेको उनले बताए । ‘परिषदबाट सबै खेलकुद हेर्ने जिम्मेवारी हुन्छ ।’–उनले भने । खेलकुदको शुरुवात र नेपालमा विकासक्रमबारे प्रकाश पार्दै कुनै बेला मनोरञ्जन हुँदै अहिलेको अवस्थामा आईपुगेको उनले बताए । खेलकुद एउटा विशिष्ट विधाका रुपमा विकास भएको उनले बताए । खेलकुदले राजनितिलाई दिशानिर्देश गर्ने उनले उदाहरण दिदै खेलकुद प्राथमिकतामा पर्न नसकेको दुखेसो गरे । ‘खेलकुदकर्मी राजनितिमा आउनुपर्छ ।’–उनले भने । खेलकुदबाट युवाहरुमा एकता ल्याउन मद्यत मिल्ने उनले बताए । भलिबल नेपालको हरेक क्षेत्र र भुगोलमा खेल्ने हुदा पनि यसलाई राष्ट्रिय खेलको रुपमा घोषणा गरिएको उनले बताए । भौतिक पुर्वाधार पर्याप्त नहुदा समस्या छ । राष्ट्रिय खेलको प्रत्येक प्रदेशमा एकएक वटा खेल पुर्वाधार जरुरी छ । प्रतियोगिता आयोजना हुदा यसले खेलाडीहरुको कन्फिडेन्स लेभल बढ्ने र खेल राम्रो हुने हुदा पनि निरन्तर हुन जरुरी रहने उनले बताए । पछिल्लोसमय कर्पोरेट क्षेत्रबाट आर्थिक कारण देखाएर सहयोग घटेको उनले बताए । कर्पोरेट क्षेत्रबाट सामाजिक क्षेत्रमा १० प्रतिशत खर्च गर्नुपर्नेमा त्यसको आधा खेलकुदमा लगाउनुपर्ने उनले आग्रह गरे ।

नवनियुक्त अध्यक्ष योग गुरुङले भलिबल खेलमा लुम्बिनी प्रदेशको पहिचानलाई कायम राख्ने गरि खेलाडी उत्पादन, प्राविधिक जनशक्ति उत्पादन र खेल गतिविधिलाई जोड दिने बताए ।

कार्यक्रममा नेपाल भलिबल संघका केन्द्रीय उपाध्यक्ष भिम वलीले नेतृत्वबाट संघको गतिविधि नहुदा विधानको ब्यवस्था अनुसार नै विशेष बैठक गरि विशेष साधारण सभामार्फत नया नेतृत्व चयन भएको बताए । भलिबलको ईतिहास र लुम्बिनी क्षेत्रको योगदानलाई प्रष्टाउदै अबको योजनाबारे प्रकाश पारे । साधारण सभाबाट जिम्मेवारी हेरफेर गर्ने प्रावधान रहेको हुदा त्यसै अनुसार नै गरिएको उनले बताए । प्रदेश खेलकुदमा सबै खेल सम्बद्घ संघसंस्थाहरु जोड्ने काम जरुरी रहेको उनले बताए ।

कार्यक्रममा नेपाल खेलकुद पत्रकार मंच रुपन्देहीका अध्यक्ष सुमन अधिकारीले संघको विशेष साधारण सभाबाट गति लिने वातावरण बन्नेमा आशावादी रहेको बताए । देशकै भलिबल खेलाडी उत्पादनमा लुम्बिनी प्रदेशको महत्वपुर्ण योगदान रहेको भन्दै यसमा सरकारबाट लगानी जरुरी रहेको उनले बताए ।
कार्यक्रममा संघका उपाध्यक्ष कृष्णा पाठकले प्रदेश गठनको उदेश्य अनुसार काम गर्न टिम सफल नहुदा विशेष बैठक गर्ने वातावरण सृजना भएको बैठक बस्नेदेखि कार्ययोजना बनाउने सम्मको काम गर्न नसकिएको उनले बताईन ।

कार्यक्रममा केन्द्रीय सचिव झक बहादुर मिदुन, केन्द्रिय सदस्य किशोर आचार्य, जिल्ला खेलकुद विकास समितिका कार्यालय सचिव चन्द्रकान्त आचार्य, उपाध्यक्ष रमेश कर्माचार्यले शुभकामना दिए ।