© २०२३
२ बैशाख २०८२, मंगलवार
२ बैशाख २०८२, मंगलवार
भक्तपुर, २९ चैत ।
ऐतिहासिक तथा सांस्कृतिक महत्वले भरिएको बिस्काः अर्थात् बिस्केट जात्रा भक्तपुरमा धुमधामसाथ अगाडि बढिरहेको छ। जात्राको दोस्रो दिन आज भैरव र भद्रकालीको रथमा विशेष पूजाआजा गरिएको छ।
स्थानीय भक्तजनहरू बिहानैदेखि टौमढीमा भेला भई तान्त्रिक विधिअनुसार भैरव र भद्रकालीको पूजा गरेका हुन्। नयाँ वर्षको चार दिनअगाडि सुरू भई नयाँ वर्षसम्म मनाइने यो जात्रा आठ रात नौ दिनसम्म विविध विधि, परम्परा र श्रद्धासाथ मनाइन्छ।
जात्राको विशेष आकर्षण भनेको भैरवको रथ तान्ने परम्परा हो। टौमढीबाट सुरु गरिने रथ तान्ने क्रम भक्तपुरको माथिल्लो र तल्लो क्षेत्रका बासिन्दाबीच हुने परम्परागत प्रतिस्पर्धासँग जोडिएको छ। रथ तान्ने क्रममा भक्तजनहरूको ठूलो भीड लाग्ने र रमाइलो वातावरण बन्ने गर्छ।
जात्राको अन्त्यतिर, चैत्र मसान्तमा इन्द्रध्वजासहितको लिङ्गो ठड्याइन्छ, र वैशाख १ गते साँझ लिङ्गो ढालेर जात्राको समापन गरिन्छ। सो दिन भक्तपुरको भेलुखेल मैदानमा भव्य मेला लाग्ने गर्छ। स्थानीय जनविश्वासअनुसार, बिस्काः जात्रा हेरेमा शत्रु नाश हुन्छ भन्ने मान्यता रहेको छ। त्यसैले यसलाई ‘शत्रुहन्त जात्रा’ पनि भनिन्छ।
© २०२३
सर्वाधिकार सुरक्षित
Design & Developed By:
