खोज

काठमाडौँ, २९ चैत।

पूर्व–पश्चिम राजमार्गअन्तर्गत नारायणगढ–बुटवल सडक खण्डको दाउन्ने क्षेत्रमा रोकिएका गाडीहरू आजदेखि पुनः चल्न थालेका छन्। गएराति १२ बजेदेखि पूर्ण रूपमा अवरुद्ध भएको सडकमा केहीबेर अघिदेखि गाडी चलाउन थालिएको नारायणगढ–बुटवल सडक आयोजना पश्चिम खण्डका प्रमुख शशांक मिश्रले जानकारी दिए।

बुधबारदेखि दिउँसो ११ बजेदेखि ३ बजेसम्म सडक स्तरोन्नतिको काम हुँदै आएकोमा, आज अत्यधिक गाडी रोकिएकाले दिउँसोको काम स्थगन गरी सवारी सञ्चालन गराइएको हो।

सडकमा जमेको धूलोमा वर्षा परेपछि बाटो चिप्लो भई गाडी चल्न नसक्ने अवस्था आएको थियो। करिब दुई फिटसम्म धूलो जमेको सडकमा पानी परेपछि चिप्लो हिलो बनेको र गाडीहरू सोही हिलोमा फँस्दा यात्रुहरूलाई निकै सास्ती भएको जनाइएको छ।

दाउन्ने पूर्व क्षेत्रमा अत्यधिक ट्राफिक जाम देखिएको छ। जिल्ला प्रहरी कार्यालयका प्रमुख प्रहरी उपरीक्षक यादव ढकालका अनुसार, दाउन्नेदेखि चोरमारासम्म करिब २० किलोमिटरभन्दा बढी ट्राफिक जाम भएको हो।

सडक निर्माण परियोजनाका प्रमुख मिश्रका अनुसार, दाउन्ने क्षेत्रको माटोको बनोट यस्तो छ कि सुक्खायाममा अत्यधिक धूलो उठ्छ भने पानी परेपछि बाटो चिप्लो भएर गाडी चल्न असहज हुन्छ।

हाल १३ किलोमिटर लामो खण्डमा ग्राभेल गर्ने काम भइरहेकाले, आगामी वर्षायाममा केही सहज हुने आशा व्यक्त गरिएको छ।