खोज

गौतमबुद्ध अन्तर्राष्ट्रिय विमानस्थलबाट भैरहेको अन्तर्राष्ट्रिय उडान रोकिएकोमा पर्यटन व्यवसायी चिन्तित वनेका छन् । भैरहवामा यात्रुको चाप बढ्दै गर्दा बायुसेवा कम्पनीहरूले अन्तर्राष्ट्रिय उडान रोकेकोप्रति लुम्बिनी क्षेत्रमा सन्नाटा छाउनु स्वाभाविक छ । गौतमबुद्ध अन्तर्राष्ट्रिय विमानस्थलबाट पुनः उडानको माग गर्दै सिद्धार्थ सञ्जाल रूपन्देहीले सरकार र बायुसेवा कम्पनीहरूको ध्यानाकर्षण गरेको छ । बायुसेवा कम्पनीहरूले यात्रु पाइरहेको अवस्थामा पनि उडान रोकिनु अत्यन्त दुःखद छ । अन्तर्राष्ट्रिय उडान सुरु नभए आन्दोलन गर्न बाध्य हुने सञ्जालले चेतावनी दिएको छ । जहाजले यात्रु पाउँदा पनि उडान रोकिनु अत्यन्त दुःखद कुरा हो । अर्कोतर्फ सरकारले समेत कुनै पहल नगरेकोमा लुम्बिनी क्षेत्रका पर्यटन व्यवसायी आक्रोसित भएका छन् । पोखरा अन्तर्राष्ट्रिय विमानस्थलबाट नियमित अन्तर्राष्ट्रिय उडान शुरू हुँदै गर्दा भैरहवाको अन्तर्राष्ट्रिय उडान रोकिनु चिन्ताजनक कुरा हो । पोखरामा चिनियाँ वायु सेवा सिचुवान एअरलाइन्सले हप्तामा एउटा चार्टर्ड उडान गरिरहेको छ । हिमालय एअरलाइन्सले नियमित उडान थालेको छ । पोखराबाट अन्तर्राष्ट्रिय उडान हुँदै गर्दा भैरहवाबाट उडान बन्द हुनु साँच्चै बिडम्वनाको कुरा हो ।

भैरहवाको गौतमबुद्ध अन्तराष्ट्रिय विमानस्थलबाट गत मार्च महिनामा मात्रै सात हजार ३४ यात्रुले अन्तर्राष्ट्रिय उडान र अवतरण गरेका थिए । मार्चमा कुल १३७ वटा अन्तर्राष्ट्रिय उडान र अवतरण भएको थियो । पछिल्लोसमय अन्तर्राष्ट्रिय उडान गर्ने यात्रुको संख्या बढिरहेको थियो । अघिल्ला महिनाहरूको तुलनामा मार्च महिनामा भैरहवाबाट अन्तर्राष्ट्रिय उडान गर्ने यात्रुको संख्या सबैभन्दा बढिरहेको थियो तर यात्रु बढ्दै गर्दा अन्तर्राष्ट्रिय बायु सेवा कम्पनीहरूले सेवा रोकेका छन् । यसमा ठूलो चलखेल रहेको कुरा कतैबाट लुकेको छैन् । विदेशी एयरलाइन्स कम्पनीहरूले उडानलाई निरन्तरता नदिँदा लुम्बिनी क्षेत्रका पर्यटन व्यवसायीहरू निराश भएका छन् । त्यसो त नेपालले बेलाबेलामा पर्यटन व्यवसाय प्रवद्र्धनका लागि नीति तथा कार्यक्रम पनि बनाउँदै आएको छ । कार्यक्रम कार्यान्वयन भएको पनि छन् । तर, पर्याप्त भने छैनन् । विभिन्न योजनाहरूले केही न केही प्रतिफल दिएका पनि छन् । कोभिडपछि पर्यटन व्यवसायमा चहलपहल आउँदै गर्दा भैरहवा क्षेत्रमा अन्तर्राष्ट्रिय उडान रोकिनु यो क्षेत्रका लागि ठूलो चुनौति हो । नेपाल पर्यटन बोर्डले समेत पर्यटक आगमन संख्यामा वृद्धि गरी नेपाल बसाइको अवधि लम्ब्याउने कार्यक्रम सञ्चालन गर्दै आएको अवस्थामा भैरहवा क्षेत्रमा एउटा पनि अन्तर्राष्ट्रिय उडान नहुनु चिन्ताको कुरा हो । अर्बौं लगानी गरेर बनेको यो विमानस्थललाई डुबाउने काम भएको छ । यो बिषयमा यस क्षेत्रका पर्यटन व्यवसायीले एकपटक गंभीर भएर सोच्नु जरुरी छ ।

भैरहवाबाट अन्तर्राष्ट्रिय उडानको नियमितताका लागि तत्काल पहल थाल्नु जरुरी छ । यसका लागि संघीय सरकारलाई दवाव दिने काममा ढिलाई गरिनुहुँदैन । संघीय सरकारले यो विमानस्थललाई कुनैपनि अवस्थामा चलाउने प्रतिवद्धता जनाईरहेको अवस्थामा उडान नै बन्द हुने जुन काम भएको छ, त्यसले सरकारलाई पनि गिज्याईरहेको छ । नेपालको विकास पर्यटन क्षेत्रबाट संभव छ । विदेश मुद्रा आर्जनको भरपर्दो माध्यम पर्यटन हो तर पर्यटन क्षेत्रलाई नै धरासायी बनाउने काम भैरहेको छ । अप्रिल १ देखि भैरहवाबाट अन्तर्राष्ट्रिय उडान रोकिएको छ । उडान रोकिनुको कारणको बिषयमा सरकारले विमान कम्पनीहरूसंग कुनै छलफल नै गरेको छैन । किन बन्द भयो अन्तर्राष्ट्रिय उडान ? यसको चित्तबुझ्दो जवाफ दिने काम सरकारले गरोस् । नेपालले पर्यटन क्षेत्रको विकास र विस्तार गर्ने हो भने अरू देशसँग पनि हातेमालो गर्नुपर्छ । पर्यटन क्षेत्रमा स्वदेशी तथा वैदेशिक लगानी आकर्षित गर्न सक्नुपर्छ । पर्यटन क्षेत्रको समग्र विकासका लागि पर्यटकीय पूर्वाधारको विकास निकै महत्वपूर्ण छ । तर, सवैभन्दा पहिला अन्तर्राष्ट्रिय उडान सेवा सुचारु होस् । गौतमबुद्ध विमानस्थलबाट नियमित रूपमा हुने अन्तर्राष्ट्रिय उडानले मात्रै यो क्षेत्रको पर्यटनको ढोका खुल्नेछ । तसर्थ एकपटक फेरी यो विमानस्थल चलाउन दवावको कार्यक्रम सञ्चालन गरियोस् ।्