खोज

प्रदेश नम्बर ५ को सरकारले आज मुस्लिम धर्मावलम्बीहरूको पर्व बकर इदका अवसरमा सार्वजनिक बिदा दिने भएको छ । प्रदेश सरकारले प्रदेश मातहतका सरकारी तथा गैर सरकारी कार्यालयमा सार्वजनिक बिदा दिने निर्णय गरेको हो । बुधबार प्रदेश सरकारले सार्बजनिक बिदा दिने निर्णय गरेको आन्तरिक मामिला तथा कानुन मन्त्रालयकी उप सचिव मधु पौडेल ज्ञवालीले जानकारी दिएकी छिन् ।
मन्त्रालयले मंगलबार प्रेस विज्ञप्ती जारी गर्दै प्रदेश अन्तर्गतका सार्वजनिक कार्यालयहरू बन्द हुने बताएको हो । तर संघीय सरकार अन्तर्गत रहेका कार्यालयहरू खुल्ने नखुल्ने अन्यौल छ । संघीय सरकारले सार्बजनिक बिदा नदिए जिल्ला प्रशासन कार्यालय, नेपाल राष्ट्र बंैकको भैरहवा शाखा तथा बैंक तथा बित्तीय संस्था, भन्सार, राजश्व लगायतका कार्यालय खुल्ला रहने छन् ।
यसैबीच, प्रदेश नम्बर ५ का मुख्यमन्त्री शंकर पोखरेलले इस्लाम धर्मावलम्बीहरूको महान पर्व ईदउल अजाहा (बकर इद) पर्वको अवसरमा शुभकामना व्यक्त गरेका छन् । ‘नेपाल सांस्कृतिक विविधता भएको मुलुक हो । सांस्कृतिक विविधताले मुलुक रंगिएको छ । संघीय लोकतान्त्रिक गणतन्त्र नेपालको संविधानले अल्पसंख्यक मुस्लिम समुदायको उत्थान र विकासका लागि मार्ग प्रशस्त गरेको छ । संवैधानिक रूपमै मुस्लिम आयोगको गठन गर्ने व्यवस्था गरेर मुस्लिम समुदायप्रति सम्मान व्यक्त गरेको छ,’ मुख्य मन्त्रीले जारी गरेको शुभकामना सन्देशमा उल्लेख गरिएको छ । मुख्य मन्त्रीले समृद्ध प्रदेश खुसी जनताको लक्ष्य लिएर योजनाबद्ध विकासको दिशामा अघि बढेको जनाउँदै समृद्ध प्रदेशका माध्यमबाट समृद्ध नेपाल निर्माण गर्ने महाअभियानमा यस प्रदेशका सबै राजनैतिक दल, समुदाय, संघ संस्था र आम नागरिकमा अपिल गरेका छन् ।