खोज

सुर्खेत, ७ मंसिर ।

कर्णाली प्रदेश सरकारका मुख्यमन्त्री यमलाल कँडेलले कर्णालीका जनताले महसुस हुनेगरी प्रदेश सरकारले काम गरिरहेको बताएका छन् । आज नेपाल पत्रकार महासंघ जुम्ला शाखाले आयोजना गरेको पत्रकार भेटघाट कार्यक्रममा बौल्दै मुख्यमन्त्री कँडेलले नागरिकका अपेक्षालाई योजनामा समेट्ने काम गरिरहेको बताए ।

कर्णालीमा योजना र विकासलाई नयाँ दृष्टिकोणबाट अघि बढाउन प्रतिबद्ध रहेको उनको भनाई थियो । आफ्नो नेतृत्वमा प्रदेश सरकारले सेवाग्राहीलाई केन्द्रमा राखेर योजना बनाउने र कार्यान्वयन गरिरहेको उनको भनाई थियो । ‘योजना निर्माण र कार्यान्वयनमा कुनै प्रकारको राजनीतिक हस्तक्षेप, स्वार्थपूर्ण निर्णय र अन्याय हुनु हुँदैन’ मुख्यमन्त्री कँडेलले भने, ‘जिल्ला भ्रमणमा पुगी उनीहरुका गुनासा सुनी सोही अनुरुपको विकास गर्न लागिपरेका छौ ।’

जनताले चाहेका र जीवनस्तर सुधार गर्नसक्ने योजना मात्र ध्यानमा राखेर प्रदेश सरकारले काम गरेको मुख्यमन्त्री कँडेलको भनाइ छ । ‘विकास निर्माणलाई मात्र होइन, सुशासन र पारदर्शीताका पक्षमा पनि सरकारलाई सचेत बनाइएको छ’ कँडेलले भने ।

कर्णाली प्रदेशको विकासका लागि दीर्घकालीन योजना बनाउने र ती योजनालाई जनताको आवश्यकतासँग समाहित गराउने नीति प्रदेश सरकारले अवलम्बन गरेको कँडेलले उल्लेख गरे ।