खोज

गुल्मी, ८ चैत । जिल्लाको चन्द्रकोट गाउँपालिकामा मकै खेतीको लागि उन्नत प्रबिधिको प्रयोग गरी कृषकहरूलाई मकै खेती गर्ने तरिका सिकाएको छ । प्रधानमन्त्री कृषि आधुनिकीकरण परियोजना परियोजना कार्यान्वयन इकाई गुल्मीले कृषकहरूलाई मेशिनबाट कसरी मकै लगाउने भनेर जानकारी दिनका लागि उन्नत प्रबिधिको प्रदर्शन गरेको हो ।

उन्नत प्रबिधि मार्फत लगाएको नेपाली मकैको बीउवाट पनि राम्रो उत्पादन गर्न सकिन्छ भन्ने जानकारी गराउनका लागि परियोजनाद्वारा प्रबिधि प्रदर्शन गरिएको प्रधानमन्त्री कृषि आधुनिकीकरण परियोजना प्रमुख गंगा कुमारी पोख्रेलले जानकारी दिएकी छन । परियोजनाले स्थानीय सुर्य किरण कृषि सहकारी संस्था मार्फत चन्द्रकोट गाउँपालिका ६ अन्तर्गत रहेको मजुवामा कृषकहरू माझ उन्नत प्रबिधिको प्रयोग गरि कमै लगाउने तरिकाको बारेमा जानकारी गराएको छ ।

कमैको हाईब्रिड वीउलाई कृषकहरू माझ प्रचार प्रसार गर्ने र मकैलाई मेशिनबाट लाइनमा लगाउँदा हुने फाईदाहरूको बारेमा प्रत्यक्ष रूपमा किसानहरूलाई स्थलगत रूपमै जानकारी गराउनका लागि यो प्रर्दशन किसानहरूका लागि थप मद्दत पुग्ने चन्द्रकोट गाउँपालिकाका अध्यक्ष युबराज खत्रीले बताए । पालिकाले पनि आउँदा दिनमा यस्ता उन्नत प्रकारका प्रबिधि भित्राएर तिनै प्रबिधि मार्फत कृषकहरूलाई खेती गर्न सिकाउने अध्यक्ष खत्रीले बताएका छन ।

स्थानीय सहकारी मार्फत जिल्लाको मुसिकोट नगरपालिका, सत्यवती गाउँपालिका र चन्द्रकोट गाउँपालिकामा प्रति पाँच–पाँच रोपनी जग्गामा मकै जोन कार्यक्रम लागु गरिएको छ । जोन क्षेत्रमा परियोजनाले वीउ, मल र मेशिनरी प्रबिधिमा कृषकहरूलाई सहयोग गर्दै आएको छ । उन्नत प्रबिधिको प्रयोगबाट प्रति एक रोपनी जग्गामा तीन सय ५० किलो मकै फलाउन सक्ने अनुषन्धानले देखाएको छ ।

गुल्मीका कृषकहरूले मनकामना ३, मनकामना ६, रामपुर कम्पोजिट, अरूण २, देउती, रेसुङ्गा कम्पोजिट, गुल्मी २ का साथै ईण्डीयन हाईब्रिड मकै उत्पादन गर्दै आईरहेका छन । स्थानीय जातको तुलनामा गुल्मीमा ७० प्रतिशत किसानहरूले हाईब्रिड कमै उत्पादन गर्दै आईरहेका छन । जिल्लामा मकै प्रमुख वालीको रूपमा रहेको छ । यहाँ २२ हजार भन्दा बढी क्षेत्रफलमा मकै खेती हुने गर्दछ । विगत वर्षहरूको तुलनामा जिल्लामा मकैको उत्पादनमा कमी हुँदै आएको कृषि ज्ञान केन्द्र गुल्मीका प्रमुख नवराज भण्डारीले जानकारी दिए । यसरी उत्पादन घट्नुमा मानिसहरूको बढ्दो बसाईसराई र बादर, बनेल जस्ता जङ्गली जनावहरू मुख्य कारण रहेको भण्डारीको भनाई छ । यस आर्थिक वर्षमा जिल्लाका ६ वटा स्थानीय तहका २४ वडामा मकै जोन कार्यक्रम लागु भएको छ ।