खोज

बुटवल, २३ चैत । बुटवलमा जारी यू–१४ टि ट्वान्टी क्रिकेट प्रतियोगिताको दोस्रो दिन स्टार क्रिकेट एकेडेमी र इलिट जे आर क्रिकेट एकेडेमी विजयी भएका छन ।  वेस्टर्न क्रिकेट क्लब बुटवलको आयोजना तथा बुटवल उपमहानगरपालिकाको आर्थिक सहयोगमा शनिबार भएको पहिलो खेलमा स्टार क्रिकेट एकेडेमीले देवदह क्रिकेट युनिटलाई ५२ रन तथा दोस्रो खेलमा ईलिट जेआरले विश्व स्कुललाई ३६ रनले पराजित गरेको हो ।

नरैनापुर क्रिकेट मैदानमा भएको पहिलो खेलमा टस जितेर स्टारले ब्याटिङ रोजेर १९.२ ओभरमा सबै बिकेटको नोक्सानीमा ११६ रनको लक्ष्य खडा गरेको थियो । स्टारका आयुष अधिकारीले ३९ बलमा ३० तथा अब्राहम अलिले १७ बलमा १३ रन जोडे । देवदहका रोशन कुवँरले ४ तथा रोहित कुवँर २ बिकेट लिए । मध्यम लक्ष्य पछ्याएको देवदह १६.१ ओभरमा केवल ६४ रनमा समेटियो । कम स्कोरमा रोक्न स्टारका आदित्य भट्टराईले शानदार ५ विकेट लिए । खेलमा स्टारका आदित्य भट्टराई प्लेयर अफ म्याच घोषित भए ।

यसैगरि दोस्रो खेलमा टस जितेर ईलिट जेआरले ब्याटिङ रोज्दै १७.२ ओभरमा ४ बिकेट गुमाएर १५८ रनको लक्ष्य खडा गरेको थियो । जेआरका ओमलाल क्षेत्रीले शानदार अर्धशतक पुरा गरे । उनले ३६ बलमा ६८ रन तथा प्रशान्त अधिकारीले १८ बलमा ३० रनको योगदान दिए । विश्व स्कुलका कस्मिक थापा, बिबेक पाण्डेय, आर्कषण पौडेल र एन्जी पाठकले १–१ बिकेट लिए । मध्यम लक्ष्य पछ्याएको विश्व स्कुलका ब्याट्सम्यान २० ओभरमा केवल १२२ रनमा समेटियो । विश्वका ओपनर ब्याट्सम्यान एन्जी पाठकले ५४ बलमा ४३ रन जोडे । नैतिक गुप्ताले २१ बलमा २१ रनको योगदान दिएपनि जितका लागि पर्याप्त भएन । जेआरका ओम लाल क्षेत्रीले ३ बिकेट लिए । खेलमा ईलिट जेआरका ओम लाल क्षेत्री प्लेयर अफ दी म्याचबाट पुरस्कृत भए ।

प्रतियोगितामा १२ वटा टिम दुई समुह विभाजन गरी राउण्ड रोविनका आधारमा खेलाएर समूहको शिर्ष दुई टोलीले उपाधिका लागि प्रतिस्पर्धा गर्ने क्लबका अध्यक्ष भुवन पाण्डेले बताए । प्रतियोगितामा विजेता टिमले नगद ४१ हजार ट्रफी, मेडल र प्रमाणपत्र तथा उपविजेता टिमले २१ हजार नगद राशी प्राप्त गर्ने उनले बताए । यसैगरी विधागत तर्फ उत्कृष्ट व्याट्सम्यानलाई २ हजार ५ सय, सर्वोत्कृष्ट खेलाडीलाई ५ हजार नगद राशीले सम्मान गरिने उनले बताए ।