खोज

बुटवल, २३ चैत ।
बुटवलमा अन्डर यू–१४ टी–२० क्रिकेट प्रतियोगिता शुक्रबारदेखि सुरु भएको छ । १४ वर्ष मुनिका खेलाडीहरूको प्रतिभालाई बाहिर निकाल्न र खेल प्रतिको मोहलाई उजागरण गर्न क्रिकेट प्रतियोगिता सुरु भएको हो । वस्टर्न क्रिकेट क्लब बुटवलको आयोजना तथा बुटवल उपमहानगरपालिकाको आर्थिक सहयोगमा प्रतियोगिता सुरु भएको हो ।
बुटवलको नरैनापुर क्रिकेट मैदानमा संचालन भएको प्रतियोगितामा आज दुई खेल सम्पन्न भएको छ । पहिलो खेलमा स्टार क्रिकेट एकेडेमी र लुम्बिनी बोर्डिङ स्कुल आमने सामने भएका थिए । प्रतियोगितामा स्टार क्रिकेट एकेडेमी १०९ रनले विजयी भएको छ । त्यस्तै आजै भएको दोस्रो खेल इलिट जे आर क्रिकेट एकेडेमी र प्यारामाउन्ट स्कुल बिच भएको खेलमा इलिट जे आर विकेटले विजयी भएको छ ।

प्रतियोगिताको उदघाटन गर्दै बुटवल नगर खेलकुद विकास समितिका अध्यक्ष बोनिन पियाले बुटवलमा हरेक दिन केही न केही खेलकुद गतिविधि भइरहेको उल्लेख गर्दै बुटवललाई खेलकुदको हब बनाउने अभियानमा आफूहरू निरन्तर लागिपरेको बताए । साथै, बुटवलमा आगामी बैशाख महिनामा अन्डर १६ क्रिकेट र भलिबल प्रतियोगिता आयोजना गरिने जानकारी पनि उनले दिएका छन् ।प्रतियोगितामा नेपाल पत्रकार महासंघ, रूपन्देहीका उपाध्यक्ष विश्वास ढकाल, हैदरावादी दम बिर्यानीका सञ्चालक जनक खड्का, स्टार क्रिकेट एकेडेमीका सञ्चालक कविता गौचन लगायतको उपस्थिति रहेको थियो । कार्यक्रमको सञ्चालन वस्टर्न क्रिकेट एकेडेमीका सचिव भुवन अधिकारीले गरेका थिए ।
विभिन्न १२ वटा समूह सहभागी यस प्रतियोगितामा दुई समुह विभाजन गरी राउण्ड रोविनका आधारमा खेलाई समूहको शिर्ष टोलीले उपाधिका लागि प्रतिस्पर्धा गर्ने क्लबका अध्यक्ष भुवन पाण्डेले जानकारी दिए ।

प्रतियोगितामा विजेता टिमले नगद ४१ हजार ट्रफी, मेडल र प्रमाणपत्र तथा उपविजेता टिमले २१ हजार नगद राशी प्राप्त गर्ने पाण्डेले जानकारी दिए । यसैगरी विधागत तर्फ उत्कृष्ट व्याट्सम्यानलाई २ हजार ५ सय, सर्वोत्कृष्ट खेलाडीलाई ५ हजार नगद राशीले सम्मान गरिने उनले बताए ।