खोज

गुल्मी, २४ चैत ।
गुल्मी उद्योग वाणिज्य संघको अध्यक्षमा मृगेन्द्रप्रसाद श्रेष्ठको अध्यक्षतामा नयाँ नेतृत्व चयन भएको छ । शुक्रबार सदरमुकाम तम्घासमा सम्पन्न निर्वाचनमा श्रेष्ठले ३ सय २१ मत प्राप्त गरी संघको अध्यक्षमा निर्वाचित बनेका थिए । श्रेष्ठसँगै अध्यक्ष पदका प्रतिस्पर्धि रामप्रसाद पन्थीले २ सय १ मत प्राप्त गरेका थिए । अध्यक्ष पदमा मात्र भएको निर्वाचनमा काँग्रेस निकट व्यवसायी मृगेन्द्रप्रसाद श्रेष्ठ र रामप्रसाद पन्थी बीच चुनावी प्रतिस्पर्धा भएको थियो । कुल ५ सय ८५ मतदाता रहेको गुल्मी उद्योग वाणिज्य संघमा शुक्रबार भएको निर्वाचनमा ५ सय ३५ मत खसेको थियो । अध्यक्षका लागि मात्र मतदान भए पनि अन्य सम्पूर्ण पदहरू भने निर्विरोध भएको थियो । नव गठित गुल्मी उद्योग वाणिज्य संघको उपाध्यक्षमा ताराप्रसाद भुसाल, इश्वरीप्रसाद बेल्वासे र गोपालप्रसाद भुसाल रहेका छन । संघको महासचिवमा चेतनारायण पाण्डे, सचिवमा बिष्णुप्रसाद अधिकारी, कोषाध्यक्षमा इश्वरी कँडेल र सहकोषाध्यक्षमा कृष्ण खनाल रहेका छन ।

त्यसैगरी अन्य सदस्यहरूमा महेशकुमार राजभण्डारी, बादल श्रेष्ठ, तोमलाल पन्थी, ज्ञानबहादुर भलामी, किशोरप्रसाद मरासिनी, रामु सुनार, चन्द्रमणी भण्डारी, चन्द्रमणी पाण्डे, कमला श्रेष्ठ र शशी केसी रहेका छन । गुल्मी उद्योग वाणिज्य संघको चैत ८ गते रेसुङ्गामा ३३ औं साधारणसभा सम्पन्न भएको थियो । साधारण सभापछि नौं गते अधिवेशन हुने तयारी भएपनि सहमती जुटाउनका लागि भन्दै अधिवेशन सारिएको थियो । तर सहमती जुट्न नसकेपछि श्रेष्ठ र पन्थी बीच चुनावी प्रतिस्पर्धा भएको हो । नेकपा एमाले निकट व्यावसायीहरूले २०७६ मा गुल्मी उद्योग वाणिज्य संघबाट अलग बनेर चेम्बर अफ कमर्शको शाखा स्थापना गरेपछि संघमा अहिले अधिकांश काँग्रेस निकट व्यावसायीहरू रहेका छन ।