खोज

सुर्खेत,२२ चैत ।
श्रीमानाको हत्यारालाई कारबाहीको माग राख्दै उच्च अदालत सुर्खेतको गेटमा धर्नामा बसेकी जाजरकोटकी निर्मला शाही आत्मदाहको प्रयास गरिन् । पेट्रोल छर्केर आगो लगाउने प्रयास गरेपछि प्रहरीले नियन्त्रणमा लियो । श्रीमानको हत्यारालाई काराबाहीको माग गर्दे उनले आत्मदाहको प्रयास गरेकी हुन् ।जुनीचाँदे गाउँपालिका–६ मइपकी निर्मला शाहीसँगै रहेकी उनकी बहिनी सर्मिला शाहीले पेट्रोल छर्केर आगो लगाउने प्रयास गरेपछि सुर्खेत प्रहरीले नियन्त्रणमा लिएको हो ।
जाजरकोट जिल्ला अदालतले निर्मलाका श्रीमान रामबहादुरको कर्तव्य ज्यान मुद्दामा चार जनालाई पूर्पपक्षका लागि कारागार पठाउन आदेश दिइ सकेको छ । बाँकी दुई जनालाई धरौटी र दुई जनालाई साधारण तारेकमा छाडेपछि रामबहादुरकी श्रीमती मंगलबारदेखि न्याय माग्दै उच्च अदालत अगाडी धर्नामा बसेकी हुन् ।

‘उहाँ धर्नामा बसिराख्नु भएको थियो आज एक्काशी शर्मिला शाहीले पेट्रोल ल्याएर छर्केर आगो लगाउन खोजेपछि हामीले नियन्त्रणमा लिएका हौं,’ जिल्ला प्रहरी कार्यालय सुर्खेतका डिएसपि वीरेन्द्रविर विश्वकर्माले भने, ‘प्रहरी कार्यालय ल्याएपछि उहाँका आफन्त बोलाएर सम्झाई बुझाई गरेर जिम्मा लाएर पठाएका छौं ।’ यस घटनाको मुद्दा प्रक्रियामा रहेकाले अपराध गरेकालाई सजाय हुने भनेर सम्झाईबुझाई निर्मलालाई पठाएको डिएसपि विश्वकर्माले जनाए । गत माघ १८ गते जुनीचाँदे गाउँपालिका–६ मइपका रामबहादुर शाहीको हत्या भएको थियो । शाही माघ १७ गते जुनिचाँदे गाउँपालिका–५ स्थित एक विद्यालयमा खेलकुद प्रतियोगिता हेर्न गएका थिए ।

खेलकुद कार्यक्रम हेरेर फर्किने क्रममा घर नजिकै खोलामा उनी मृत अवस्थामा भेटिएका हुन् । इलाका प्रहरी कार्यालयका अनुसार प्रहरी टोली घटनास्थल पुगेर घटनाको अनुसन्धान अगाडि बढाएको थियो ।अनुसन्धानको क्रममा रामबहादुरको हत्यामा संलग्न भएको आरोपमा जाजरकोट प्रहरीले ९ जनालाई पक्राउ गरेर उनीहरु विरुद्ध जाजरकोट जिल्ला अदालतमा मुद्दा दायर गरेको थियो । जाजरकोट प्रहरीले उनीहरु विरुद्ध फागन ११ गते अदालतमा कर्तव्य ज्यान मुद्दा दर्ता गराएको हो । अदालतले फागुन १३ गते थुनछेक बहसपछि पाँच जनालाई धरौटी र चार जनालाई कारागार चलान गरिसकेको छ ।
निर्मलाले धरौटीमा अदालतले छाडेकोमा चित्त नबुझेको भन्दै छुटेकाहरुलाई थुनामा पठाइ पाउँ भन्दै उच्च अदालतमा निवेदन दर्ता गराएकी छन् ।