खोज

कर्णाली प्रदेश योजना आयोगका उपाअध्यक्ष पुण्यप्रसाद रेग्मीले तत्काल पञ्चवर्षीय योजना निर्माणमा लाग्ने बताएका छन् । आईतबार मुख्यमन्त्री तथा मन्त्रीपरिषद् कार्यालयमा आयोजित सपथ ग्रहण समारोहमा बोल्दै उपाअध्यक्ष रेग्मीले यस्तो बताएका हुन् । उनले भने ‘अव तत्कालै कर्णाली प्रदेशको अहिलेको अवस्था देखाउने मानचित्र तयार गर्छौं । त्यसको लागी पञ्चवर्षीय योजना तयार गर्नु जरुरी छ । तत्काल यो काममा मेरो ध्यान जाने छ ।’ उनले थपे ‘हाल पुजींगत वजेट खर्च हुन नसक्ने अवस्था रहेको छ । आयोगको क्षेत्राधिकार भित्र रहेर अनुगमनको कामलाई पनि प्रभावकारी रूपमा अगाडि वढाउने प्रतिवद्धता मैल व्यक्त गर्न चाहान्छु । ’ कर्णाली प्रदेशका मुख्यमन्त्री महेन्द्रबहादुर शाहीले आयोगका उपाध्यक्ष पुण्य रेग्मीलाई सपथ ग्रहण गराएका थिए । मुख्यमन्त्री शाहीवाट सपथ ग्रहण गरे लगत्तै उपाध्यक्ष रेग्मीले आयोगका सदस्यहरू डा.दिपेन्द्र रोकाया र योगेन्द्र शाहीलाई समेत सपथ ग्रहण गराएका थिए ।
त्यस्तै योजना आयोगका पदाधिकारीहरूले आजै पदवहाली समेत गरेका छन् । आर्थिक मामिला तथा योजना मन्त्रालयमा व्यवस्थापन गरिएको कार्यकक्षमा उपाध्यक्ष डा.पुण्य रेग्मी, सदस्यद्धय डा. दिपेन्द्र रोकाय र योगेन्द्र शाहीले पदवहाली गरेका हुन् । सपथ ग्रहण पश्चात आयोगको बैठक बसी विभिन्न निर्णय समेत गरको छ ।
मुख्यमन्त्री तथा आयोगका अध्यक्ष महेन्द्रवहादुर शाहीको अध्यक्षतामा आईतवार मुख्यमन्त्री तथा मन्त्रीपरिषदको कार्यालयमा सम्पन्न वैठकले कर्णाली प्रदेशको दिर्घकालीन विकास मार्गदर्शनको रूपमा प्रथम पञ्चवर्षीय योजनाको आधारपत्र चालु आव भित्रै तयार गर्ने निर्णय गरेको छ । त्यसैगरि वैठकले आर्थिक वर्ष २०७६÷०७७ को वार्षिक नीति तथा कार्यक्रम एवं वजेट तथा योजना तयार गर्न सघाउ पुग्ने गरि वार्षिक योजना तयार गर्ने निर्णय समेत गरेको सदस्य सचिव तथा आर्थिक मामिला तथा योजना मन्त्रालयका सचिव ढुण्डीप्रसाद निरौलाले जानकारी दिए ।
निरौलाका अनुसार चालू आवको वजेट कार्यान्वयनलाई प्रभावकारी वनाउन अनुगमण मूल्याँकन निर्देशिका तयार गरी प्रभावकारी अनुगमणको व्यवस्था मिलाउने पनि आजको वैठकले निर्णय गरेको छ । वैठकले परियोजना वैंक तयार गर्ने, कर्णाली प्रदेशको दिर्घकालीन गुरुयोजना तयार गर्ने, कर्णाली प्रदेशको वास्तविक अवस्था पहिचान सहितको तथ्याँक, सुचकांक र प्रारूप तयार गर्ने, लगायतका निर्णय गरेको छ । आयोगको कामलाई प्रभावकारी वनाउन आवश्यक कार्ययोजना र कार्यतालिका तयार गरी आगामी वैठकमा पेश गर्ने निर्णय पनि आजको वैठकले गरेको छ । वैठकमा योजना आयोगका पदाधिकारी तथा प्रदेश सरकारका मन्त्रीहरूको सहभागिता रहेको थियो ।