खोज

तुलसीपुर उप महानगरपालिकाले कृषि बजारलाई व्यवस्थित गर्नका लागि आधुनिक कृषि उपज बजार केन्द्र निर्माण गर्दै छ । कृषक र व्यवसायीहरूलाई एकै ठाउँबाट कृषि उपज बिक्री गर्न मिल्ने गरि तुलसीपुर उप महानगरपालिका वडा नम्वर ६ मा रहेको मावि सेन्टरको जग्गा भाडामा लिएर भवन निर्माण गर्न लागिएको हो ।
२ करोड ६९ लाखको लागतमा निर्माण हुने भवनलाई दुई चरणमा निर्माण गरीने छ । पहिलो चरणमा टहरा, बाटो, लगायतका संरचना निर्माण हुने निर्माण समितिका अध्यक्ष झुपलाल खड्काले जानकारी दिए । उनले पहिलो चरणमा १ करोड १० लाख लागत लाग्ने अनुमान गरीएको बताए । पहिलो चरणको निर्माणको काममा ३० लाख उप महानगरपालिकाले अनुदान दिने र ८० लाख व्यवसायीहरूले उठाएर निर्माण हुने छ । बजार केन्द्र निर्माणको काम सुरु भैसकेको अध्यक्ष खड्काले बताए ।
‘पहिलो चरणको काम चैत्र अगाडि नै सम्पन्न भएर बजार सञ्चालनमा आउने छ, भने त्यसपछि दोस्रो चरणको काम सुरु हुनेछ’ खड्काले भने । खड्काका अनुसार दोस्रो चरणमा शितभण्डार निर्माण लगायतका अन्य कामहरू गर्ने समेत हुने छ । तरकारी र फलफुल व्यापारीका लागि ४० वटा टहरा निर्माण गरिने र विचमा किसानहरूको कृषि उपज विक्रीका लागि ठाउँ राखिने पनि उनले बताए । गत कार्तिक १७ गते कृषि उपज बजार केन्द्रको भवन तुलसीपुर उप महानगरपालिकाका नगरप्रमुख घनश्याम पाण्डेले शिलन्यास गरेका हुन् । तुलसीपुर बजारमा रहेको सानो तरकारी बजारले माग धान्न नसक्ने भएकोले आधुनिक बजारको आवश्यकता भएको नगर प्रमुख पाण्डेले बताए ।
नगरप्रमुख पाण्डेले आफु उपमेयर हुँदा नै तुलसीपुरको तरकारी वजार निर्माण गरेको र अहिले पनि त्यसलाई थप व्यवस्थित गर्न लागेको जानकारी दिए । समृद्धिको पहिलो शर्त उत्पादन र वितरण भएकाले कृषि उत्पादन वृद्धि गर्न र विक्री वितरणलाई व्यवस्थित गर्नका लागि उप महानगरपालिकाले कृषिमा विशेष योजना निर्माण गरेको पाण्डेको भनाई छ । दक्ष कृषि प्राविधिक उत्पादन गर्नका लागि यसै वर्षबाट कृषि प्राविधिक सञ्चालनका लागि सामुदायिक विद्यालयलाई उप महानगरपालिकाले अनुदान समेत दिएको पाण्डेले वताए । उनले २० वर्ष पछि सबै संरचना विद्यालयलाई दिने गरि बजार केन्द्र निर्माण गर्न लागेको जानकारी दिए । ‘अहिले विद्यालयलाई यो जग्गाको आवश्यकक्ता छैन तर २० वर्षपछि त्यो महसुस भयो भने अर्को ठाउँमा वजार सारिनेछ’ पाण्डेले भने ।
कृषि उपज बजार केन्द्रलाई आधुनिक तथा सुबिधा सम्पन्न बनाउनका लागि बजार केन्द्रमा ल्याव समेत राखिने पाण्डेको योजना छ ।
कृषि उपज बजार केन्द्रको निर्माण पश्चात कृषकहरूलाई पनि आफ्नो उत्पादनको बिक्रीका लागि सहज हुने अपेक्षा गरिएको छ । तुलसीपुर उप महानगरपालीकाका कृषक दोलख बहादुर खत्रीले बजार केन्द्र निर्माणले आफूहरू खुसी भएको बताउँदै किसानले कृषि उपज उचित मुल्यमा बिक्री गर्न पाउनेमा आशावादी रहेको वताए । बजार केन्द्रको अभावमा शहरका घरघरमा तरकारी डुलाउँदै हिँड्नुपर्ने बाध्यता रहेकोमा निर्माण हुन लागेको केन्द्रले अन्त्य गर्ने विश्वास कृषकहरूले गरेका छन् ।