खोज

चाडपर्व नजिकिएसँगै यात्रुहरूको सुविधालाई मध्यनजर गर्दै कपिलवस्तुको कृष्णनगरस्थित सीमाक्षेत्रमा नागरिक सहायता केन्द्र स्थापना गरिएको छ । नेपालीहरूको महान पर्व दशैं, तिहार र छठ जस्ता चाडपर्व मनाउन आउने नेपाली यात्रुहरूको सहजताका लागि नेपाल प्रहरी र सशस्त्र प्रहरीले छुट्टाछुट्टै स्थानमा नागरिक सहायक केन्द्र स्थापना गरेका हुन् । दशैंका बेला नेपाल फर्किने यात्रुहरूहरूलाई बिना झन्झट सहज तरिकाले यात्रा गर्ने वातावरण निर्माण गर्न हेल्प डेक्स स्थापना गरिएको इलाका प्रहरी कार्यालयका प्रहरी निरीक्षक सूर्य बोगटीले जानकारी दिए ।
यतिमात्र होइन सीमाक्षेत्र अन्तर्गत जिल्लाको चाकरचौंडा र मर्यादपुरमा समेत नागरिक सहायता केन्द्र संचालन गरिएको जिल्ला प्रहरी कार्यालय कपिलवस्तुका प्रहरी नायब उपरीक्षक रबि रावलले जानकारी दिए । यसका साथै जिल्लाको चन्द्रौटा चोकमा समेत नागरिक सहायता केन्द्र स्थापना गरिएको प्रहरीले जनाएको छ । नागरिक सहायता केन्द्रमा जनपद प्रहरी र ट्राफिक प्रहरी खटिएका छन् । केन्द्रमा खटिएका प्रहरीले समस्यामा परेका यात्रुहरूलाई आवश्यक सहायता गर्ने बताइएको छ ।बिगतका दिनमा बजार गर्न जाने नेपाली नागरिक, प्रवासबाट नेपाल फर्कने र प्रवास जाने नेपालीले विभिन्न सास्ती भोग्नुपरेको जनगुनासोलाई कमी गर्न यात्रु सहायता केन्द्र सञ्चालनमा ल्याइएको प्रहरी उपरीक्षक मनोज यादवले जानकारी दिए । नागरिकसँग मैत्रीपूर्ण सम्बन्ध राखी सीमाक्षेत्रमा हुनसक्ने अवान्छित क्रियाकलापलाई नियन्त्रण गर्न यात्रु सहायता कक्ष संचालन गरिएको प्रहरी उपरीक्षक यादवले बताए । सीमाक्षेत्रमा दशैं र तिहारका बेला यात्रु ठगिने, लुटिने र दुर्घटनामा समेत वृद्धि हुने सम्भावना रहेकाले सहायता कक्षमार्फत नागरिकको शान्ति सुरक्षाको लागि पहरेदारी गर्ने प्रहरी उपरीक्षक यादवको भनाई छ ।
यसैबीच सशस्त्र प्रहरी बल नेपाल, नं. ३९ गुल्म, कृष्णनगरले पनि भारतीय सीमा सुरक्षा बलसँग समन्वय गरी नागरिक सहायता कक्ष संचालन गरेको गुल्मपति सशस्त्र प्रहरी नायब उपरीक्षक मनोज कुमार धितालले जानकारी दिए । सीमाक्षेत्र वारपार गर्ने यात्रुहरूको शान्ति सुरक्षा र सुविधाका लागि नागरिक सहायता कक्ष संचालनमा ल्याएको धितालले बताए । नागरिक सहायता कक्षमा नेपालका सशस्त्र प्रहरी र भारतीय सीमा सुरक्षा बलका प्रहरी खटाइएको छ