खोज

बुटवल, २९ मंसिर । देशका विभिन्न स्थानमा भएका छुट्टाछुट्टै दुर्घटनामा ६ जनामो मृत्यु भएको छ । काठमाडौं महानगरपालिका–१५ स्वयम्भू ठाडोभर्‍याङस्थित सडकमा बा १ प ७६३ नम्बरको पर्यटक बस र मोटरसाइकल एकआपसमा ठोकिएर बिहीबार बिहान दुर्घटना हुँदा मोटरसाइकल चालक सिन्धुली मरिण गाउँपालिका ३ बस्ने २२ वर्षीय निर्मल लामाको मृत्यु भएको छ । दुर्घटनामा गम्भीर घाइते भएका उनको शिक्षण अस्पताल महाराजगंजमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ ।
यस्तै पर्वत, जलजला गाउँपालिका ८ नाईलिवाङमा ध १ ख ४९४ नम्बरको बसको ठक्करबाट सोही ठाउँ बस्ने ५० वर्षीय जुठे बहादुर दमैको बिहीबार बिहान मृत्यु भएको छ । ठक्करबाट गम्भीर घाइते भएका उनको धौलागिरी अस्पताल बाग्लुङमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ ।
धनुषा, क्षिरेश्वरनाथ नगरपालिका ३ कुम्हरौलमा बा १२ च ५३८७ नम्बरको कारको ठक्करबाट पैदलयात्री सोही नगरपालिका ४ हरैया बस्ने श्रीदेव महराकी छोरी ६ वर्षीया राखी महराको मृत्यु भएको छ । ठक्करबाट गम्भीर घाइते भएकी उनको जानकी मेडिकल रमदैयामा उपचारको क्रममा मृत्यु भएको हो । साथै दुर्घटनामा घाइते भएकी कार चालक मिथिला नगरपालिका ४ बस्ने ३२ वर्षीय बिनोद कुमार महतो कोईरीकी छोरी १० दिनकी आरुषी कुमारी महतोको न्यूरो अस्पताल जनकपुरमा उपचार भइरहेको छ । कार चालकलाई प्रहरीले नियन्त्रणमा लिएको छ ।
यसैगरी धनुषा, मिथिला नगरपालिका ७ ढल्केवरमा बुधबार राति भएको सवारी दुर्घटनामा मोटरसाइकल चालक महोत्तरी सितापुर भंगहा नगरपालिका ४ बस्ने २३ वर्षीय अमरेन्द्र महतोको मृत्यु भएको छ ।
यस्तै सिरहा, धनगढी नगरपालिका ९ जिरोमाईलमा बा१९ च ३९६६ नम्बरको गाडी र बा ५४ प ४७३२ नम्बरको मोटरसाइकल एकआपसमा ठोक्किएर दुर्घटना हुँदा मोटरसाइकल चालक झापा कमल गाउँपालिका ५ लखनपुर बस्ने ३८ वर्षीय देवदत राईको मृत्यु भएको छ ।
यस्तै उदयपुर, त्रियुगा नगरपालिका १३ किरात चोकमा लु ८२ प ६५३३ नम्बरको मोटरसाइकल रोकी राखेको ना १ ख ७७०० नम्बरको टिपरमा ठोकिएर दुर्घटना हुँदा मोटरसाइकल चालक उदयपुरगढी गाउँपालिका ६ नेपालटार बस्ने २९ वर्षीय पवन रोका मृत्यु भएको छ ।
दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।