खोज

बुटवल, १३ पुस । ग्रामिण क्षेत्रमा खेलकुद र सामाजिक गतिविधि गर्दै आएको फर्साटिकर युवा क्लबले आफनै कार्यालय भवन निमार्ण गर्न सफल भएको छ । स्थानिय दाता राजेन्द्र प्रधानको परिवारबाट प्राप्त भएको करीब साढे १६ धुर जग्गामा क्लबले शुद्धोधन गाउपालिका वडा नं ४ मा दुई कोठे पक्की भवनसहितको कार्यालय भवन निर्माण गर्न सफल भएको हो । परिसरमा नै रहेको मन्दिर ब्यवस्थापनमा समेत क्लब लागेको छ । दोस्रो कार्याकाल नेतृत्व सम्हालेका क्लबका अध्यक्ष मुकेश कुँवर भवन उद्घाटनसंगै निक्कै हर्षित छन । ‘मेरो कार्यकालमा नै दाताहरुको सहयोग र साथीभाईहरुबाट साथ पाउदा ईटा थप्ने सफल भए ।’–उनले भने । रुपन्देहीको ग्रामिण क्षेत्रका रुपमा रहेको फर्साटिकरमा खेलाडी उत्पादन र खेल प्रतियोगितामा क्लबको अग्रसरता रहदै आएको उनि बताउछन ।

शनिबार एक कार्यक्रमका बिच शुद्धोधन गाउपालिका वडा नं ४ का वडाअध्यक्ष केशव प्रसाद अधिकारीले कार्यालय भवनको उद्घाटन गर्दै खेलकुद र सामाजिक क्षेत्रमा लामो ईतिहास बोकेको क्लब आफ्नै कार्यालय ब्यवस्थापन गर्न उपयोगी भवन निर्माण गर्न सफल भएको बताए । पालिकाभित्र खेल विकासमा स्थानिय सरकारबाट वार्षिक २५ लाख रुपैया बजेट बिनियोजन गरिदै आएको उनले बताए । बजेट खेलकुद गतिविधिसंगै पुर्वाधारमा समेत उपयोग हुँदै आएको उनले बताए । फर्साटिकर माबिको खेल मैदानको स्तरोन्नति र ग्रासरुट विकास गर्न समेत क्लबसंग समन्वय गरि अघि बढेको उनले बताए । शुद्धोधन गाउपालिकालाई खेलकुदबाट चिनाउने गरि स्थानिय पालिका सबै सरोकारवालासंग समन्वय गरि अघि बढेको उनले बताए ।

रुपन्देही जिल्ला फुटबल संघका अध्यक्ष लोक पुनले रुपन्देही लिग च्याम्पियन समेत रहेको क्लब आफ्नै भवन निर्माण गरेर विकासमा ईट्टा थप्न सफल भएको बताए । लामोसमयदेखि फुटबल खेलको विकासमा अग्रसर रहेको क्लबलाई ब्यवस्थित गर्ने चरणमा अघि बढेको उनले बताए । कार्यक्रममा क्लबका संरक्षक चक्र बहादुर कुँवर, वडा सदस्य दामोदर पंगेनी, वडा सदस्य बालकृष्ण पराजुली, क्लबका लेखा सदस्य भेषराज पौडेल, यज्ञोदय माबिका पुर्वअध्यक्ष रमेश खनाल, नेकपा एमाले नगर कमिटि अध्यक्ष प्रेम रोक्का, सिएलसीका अध्यक्ष राजेश्वरी सिह, क्लबका सचिव विष्णु पंगेनीले जग्गा संरक्षण गरि समुदायको हितमा महत्वपूर्ण कार्य भएको बताए ।

क्लबका अध्यक्ष मुकेश कुँवरले आफ्नो कार्यकालमा क्लबको पुर्वाधार निर्माणसंगै ब्यवस्थापकिय काम गर्न सहज हुने बताए । दाताबाट प्राप्त जग्गामा लुम्बिनी प्रदेशका पुर्व सभासदस्य पुष्पा थारुबाट बजेट उपलब्ध भएर शुरु भएको भवन निमार्णमा विभिन्न दाताहरुबाट प्राप्त सहयोग भएको उनले बताए । पछिल्लोसमय भवनको भवन पुरा गर्न ढाई लाख रुपैया खर्च भएको उनले बताए । भवन उद्घाटनसंगै रुपन्देहीकै प्रतिष्ठित प्रतियोगिताका रुपमा परिचय बनाएको फर्साटिकर कपको १२ औ संस्करण पुस २० गते माघ २ गतेसम्म गर्न लागेको उनले बताए । यसवर्ष प्रतियोगितामा रुपन्देहीका पाचसहित पाल्पा, नवलपरासी र भारतको आसामसहित १२ टिमको सहभागिता रहने उनले बताए । ग्रामिण क्षेत्रबाट फुटबल खेल विकास गर्ने उदेश्य सहित नियमित प्रशिक्षण र प्रतियोगितामा क्लबबाट गतिविधिहरु हुँदै आएको क्लब यसपटक नया ढंगमा प्रतियोगिताको तयारीमा रहेको उनले बताए ।

प्रतियोगिताको उपाधि विजेताले नगद ३ लाख ५ रुपैया, कप, मेडल, प्रमाणपत्रबाट पुरस्कृत गरिने खेल संयोजक अकरम अलीले बताए । यसैगरि उपविजेता टिमले नगद १ लाख ५० हजार ५ रुपैया तथा सर्वोत्कृष्ट खेलाडी १५,००० हजार रुपैया, १०,००० हजार रुपैया तथा उदयमान खेलाडीलाई ५५०० तथा प्रत्येक खेलको म्यान अफ द म्याचलाई समेत नगदबाट पुरस्कृत गरिने उनले बताए । स्थानिय पालिकाबाट ८ लाख रुपैया सहयोग र अन्य प्रायोजनहरुसंगै टिकटबाट समेत आम्दानी हुने उनले बताए । प्रतियोगितामा कुल १९ लाख रुपैया खर्च हुने अनुमान आयोजकको छ । भैरव एफसी र सम्पुर्ण युवा क्लबका बिचमा उद्घाटन खेल हुने उनले बताए । गतवर्ष सम्पुर्ण युवा क्लब विजेता रहेको थियो ।