खोज

रौतहट १२ पुस ।

शिक्षक सरुवाको बहानामा विद्यार्थी उचालेर पालिका माथी आक्रमण गराउने प्रबृत्ति रौतहटमा बढ्दै गएको छ।आक्रमण गराउने योजनाकार माथी ठोस कार्वाही नहुँदा यस्तो प्रबृत्ति बढेको हो। केही समय भित्रै शिक्षक सरुवाको बिषय लिएर जिल्लामा ३ वटा नगरपालिका माथी भएको आक्रमणबाट १ करोड भन्दा बढीको सरकारी सम्पतिको नोक्सानी भएको छ। शिक्षक सरुवाकै बिषय लिएर बिहीवार रौतहटको गरुडा नगरपालिका कार्यालयमा तोडफोड गरेका छन्।

नमुना माध्यमिक विद्यालय गरुडाका विद्यार्थीहरूले  नगरपालिका भवनमा तोडफोड गरेका छन्। विद्यार्थीहरुले नगरपालिका अगाडी राखिएको मेयर चढ्ने गाडी संगै १ दर्जन बढी गाडीमा क्षती पुर्याएका छन्। नमुना माध्यमिक विद्यालयका नेपाली शिक्षक शिवशंकर झालाई माबी झाँझपुलमा सरुवा गरेको भन्दै आक्रोशित विद्यार्थीहरूले शिक्षक झाको सरुवा रोक्नुपर्ने माग राख्दै बिहीवार नगरपालिका अगाडि बिरोध प्रदर्शन गरेका थिए। प्रदर्शनको क्रममा नगर प्रहरीले दुर्व्यवहार गरेको भन्दै विद्यार्थीहरू उग्र भएर ढुंगामुढा प्रहार सुरु गरेका थिए।  ढुंगामुढा बाट नगरपालिका भवनको अधिकांश झ्यालको सिसा फुटेका छन् भने दुईवटा गाडी र दर्जनौं मोटरसाईकलमा क्षति पुगेको छ।

कार्यालय अगाडि पार्किंग गरी राखेको मेयर कन्थमनी प्रसाद जयसवाल चढ्ने ना १ झ १६७३ नम्बरको सरकारी गाडी र एकजना सेवाग्राहीको भारतीय नम्बर प्लेटको स्कारपियो गाडीमा  क्षति पुगेको छ। सरकारी गाडीको सबै सिसा फुटेको छ भने  गाडीको अन्य भागमा समेत क्षति पुगेको छ। त्यस्तै नगरपालिकामा काम गराउन आएका सेवाग्राहीहरुको १ दर्जन बढी मोटरसाईकलमा विद्यार्थीहरूले तोडफोड गरी व्यापक क्षति पुर्याएका छन्।  ढुंगा प्रहारबाट एकजना नगर प्रहरी  हवल्दार रामनारायण साह घाईते भएको र हाल उनको वीरगन्जमा उपचार भइरहेको जनाईएको छ।

ढुंगामुढाबाट कार्यालय र सवारी साधन गरी १० लाख भन्दा बढीको क्षती भएको गरुडाका मेयर कन्थमणि प्रसाद जयसवालले बताएका छन्। नमुना माबी गरुडाका प्रधानाध्यापक प्रभु राउत पटेल र सरुवा भएका शिक्षक शिवशंकर झाले विद्यार्थीलाई उचालेर यत्रो ठूलो क्षती गराएको मेयर जयसवालले आरोप लगाएका छन्  । प्रधानाध्यापक पटेल र क्षिक्षक झाले आरोप निराधार भएको भन्दै खण्डन गरेका छन्। रौतहटमा शिक्षकको सरुवा गर्दा  सरुवा भएको विद्यालयमा मा जानुको सट्टा शिक्षकहरुले विद्यार्थीलाई उचालेर पालिका माथि तोडफोड गराउने  प्रवृत्ति बढेको  छ।
शिक्षक सरुवा कै विषय  लिएर यस अघी रौतहटको देवाही गोनाहि, कटहरिया नगरपालिकामा पनि विद्यार्थीहरूले तोडफोड गरेका थिए।

विद्यार्थीको आक्रमण बाट देवाही गोनाही नगरपालिकामा ७० लाख भन्दा बढीको क्षती भएको मेयर प्रेमलाल साहले सार्वजनिक गरेका थिए। उक्त घटनामा संलग्न ९ जना माथी ईलाका प्रहरी कार्यालय गरुडामा मुद्दा दर्ता भएको थियो। त्यस अघि शिक्षक सरुवाकै बिषय लियर कटहरिया नगरपालिका माथी विधार्थी द्वारा भएको आक्रमण बाट ३० लाख भन्दा बढीको क्षती भएको तत्कालीन मेयर सियाराम कुशवाहाले सार्वजनिक गरेका थिए।

रौतहटका सिडियो हिरालाल रेग्मीले यस्तो घटना हुनु दुःखद भएको बताउँदै जनप्रतिनिधि, शिक्षक सबै बसेर असहमतिको बीच पनि सहमती गरेर आगाडी बढेमा त्यस्ता घटना पुनः न दोहोरिने सुझाव दिएका छन्। लोकतन्त्रमा सबैको अधिकारको सम्मान हुनुपर्छ तर सम्मानको नाउँमा षडयन्त्र गरेर पालिका माथी आक्रमण गराई सम्पतिको क्षती गराउने कुतत्व लाई कानूनी कारवाहीको दायरामा ल्याउने सिडियो रेग्मीले चेतावनी दिएका छन्।