खोज

सैनामैनाको विकासमा नगरपालिका कसरी अगाडि बढिरहेको छ ?
–सैनामैना नगरपालिकामा हामी निर्वाचित भैसकेपछि सबै ठाउँहरूको समानुपातिक विकास होस् भन्ने चाहना हामीले राख्यौं । विकास जुन ठाउँमा पुग्नुपर्ने हो, त्यस ठाउँमा पुगोस् भन्ने जनप्रतिनिधिको चाहना हुन्छ नै । म निर्वाचित भैसकेपछि हाम्रो कार्यपालिका, यहाँका वडाध्यक्षहरू सबैको सल्लाहबाट सैनामैनालाई केही नयाँ पहिचान दिनका लागि हामीले उज्यालो थारु गाउँ अभियान सुरुवात ग¥यौं ।
जुन २–३ सय वर्ष अगाडिदेखि नै तराइमा बसोबास गरेका थारुहरू जो मलेरिया, सिकलसेललाई पचाएर यहाँका जमिनहरू उर्वर बनाए, त्यही वर्गको गाउँमा जाँदा दयनीय अवस्था सिर्जना भयो । त्यसकारण हामीले उज्यालो थारु गाउँ अवधारणा ल्यायौं । त्यो मार्फत त्यहाँका ढल, बाटा, बिजुलीबत्ती, पूर्वाधारलगायतका क्षेत्रमा कसरी काम गर्न सकिन्छ भनेर हामी त्यो अभियानमा लागेका छौं । पहिलो वर्ष र दोस्रो वर्षको बजेटमा हामीले त्यो कार्यक्रमलाई अगाडि बढाइराखेका छौं । प्रदेश सरकार र संघीय सरकारबाट पनि त्यो योजनालाई सपोर्ट गर्ने किसिमको योजनाहरू आएको छ र त्यसले एउटा सोसाइटी नै परिवर्तन गर्ने किसिमको योजना सावित भएको छ ।

सैनामैनाको विकासका लागि मुख्य पाँचवटा प्राथमिकता के–के लाई राख्नुभएको छ ?
–कृषि, शिक्षा, स्वास्थ्य, पूर्वाधार, खेलकूदलाई हामीले विशेष प्राथमिकतामा राखेका छौं । यो त राज्यलाई नै प्राथमिकीकरण तोकिसकेको छ । यसलाई हामीले कसरी सपोर्ट गरेर लैजाने र शिक्षामा पनि नेपाल सरकारले प्रति विद्यार्थी १५ रुपियाँका दरले खाजा दिइराखेको थियो । र खाजाका लागि यसभन्दा पहिला नगद पैसा नै दिने परम्परा रहेछ । र हामी निर्वाचित भैसकेपछि पैसा सम्बन्धित विद्यार्थीसँग पुग्नुपर्छ भन्ने उद्देश्यले प्रतिविद्यार्थी ५ रुपियाँका दरले हामीले बढायौं । त्यसले गर्दा स्कुलमै पकाएर खुवाउन सक्ने वातावरण सिर्जना भयो । अहिले सैनामैना नगरपालिकामा प्रत्येक सामुदायिक विद्यालयमा यो लागू छ ।

सैनामैना पर्यटनको लागि पनि संभावना बोकेको क्षेत्र हो । यसतर्फ नगरपालिकाको के योजना छ ?
–अत्यन्तै महत्वपूर्ण प्रश्न सोध्नु भो । पर्यटनको लागि सैनामैनामा पर्रोहा परमेश्वर बोलबम धाम जो पश्चिम नेपालको पशुपतिनाथ भनेर चिनिन्छ । त्यो मन्दिरको निर्माण हामी निर्वाचित भैसकेपछि सुरुवात गरेको हो । डेढ वर्षमा पहिलो चरणको काम सम्पन्न भैसकेको छ । त्यो अहिले हेर्दाखेरी वास्तवमै अहिले लाखौं पर्यटकहरू नेपालका मात्रै नभएर भारतको उत्तरप्रदेशदेखि लिएर सबै ठाउँका पर्यटकहरू प्रशस्त मात्रामा शिवरात्रीमा र श्रावणी मेलामा आउने गरेका छन् । हाम्रो चाहना भनेको त्यतिले मात्र पुग्दैन, त्यहाँ बाह्रै महिना पर्यटकहरूको ओहोरदोहोर होस्, अलि व्यापक प्रचार प्रसार गर्न सकौं, त्यसले पूर्णता नपाइकन अरू फेरि थप दोस्रो चरणको कार्यक्रम छ, त्यसलाई पनि पूर्णता दिन सकियो भने वास्तवमा पर्यटनले धेरै ठूलो फड्को मार्न सक्छ । त्यतिमात्र नभै लुम्बिनीसँग जोडिएको सैनामैना बुद्धकालीन गाउँ हो ।
सैनामैना वडा नं. १ मा उत्खनन् गर्ने हो भने यहाँ बुद्धसँग जोडिएका धेरै वग्नावशेषहरू पाइन्छन् । त्यसैगरी यहाँका पूराना मठमन्दिरहरू, यहाँको सिमसार क्षेत्र, मलमला, राजापानी यसको पनि विकास गर्न सकियो भने अत्यन्तै महत्वपूर्ण हुन सक्छ । त्यसका अलावा हामीले सैनामैनामा भएका पूराना पोखरीहरूलाई जीर्णद्धार गर्ने, राम्रो बनाउने अभियानमा लागेका छौं । गतवर्ष मात्रै हामीले बाह्र बिघाको एउटा पोखरी निर्माण गयौं । त्यो पोखरी निर्माण गर्दा त्यस क्षेत्रमै पानीको पुनर्भरण पनि भएको छ, सिंचाई भएको छ । यसले बहुआयामिक सफलता प्राप्त गर्न सक्छ ।

खेलकूद क्षेत्रलाई नगरपालिकाले कत्तिको प्राथमिकतामा राखेको छ ?
-खेलकूद हाम्रो प्राथमिकतामै छ । सैनामैनामा अहिले वडा नम्बर ४ मा फूटबल ग्राउन्ड निर्माण भैराखेको छ । जुन सम्पन्न हुने अवस्थामा छ । वडा नम्बर ७ लम्तैयामा क्रिकट मैदान निर्माण गर्ने योजनाका साथ अगाडि बढेका छौं । संघीय सरकारबाट पर्याप्त बजेट नआएका कारण अहिले भने स्थगीत भएको छ । त्यसलाई हामीले निरन्तरता दिने प्रयासमा लागिराखेका छौं । यस अलावा प्रत्येक वडामा एउटा खेलकूद मैदान, कभर्ड हलहरू होस् भन्ने हिसाबले हामी अगाडि बढेका छौं । प्रदेश सरकारले पनि कभर्ड हल निर्माणका लागि यथेष्ट सहयोग गरिरहेको अवस्था छ ।

सडक पूर्वाधारको क्षेत्रमा कुरा गर्दा सैनामैना चक्रपथको योजना कहाँ पुग्यो ?
-सैनामैना चक्रपथको लगभग ७० प्रतिशत निर्माण सम्पन्न भैसकेको छ । त्यहाँ बन्ने केही पुलहरू बाँकी छन्, अहिले मात्रै चारवटा पुल निर्माणको काम चलिरहेको छ । पहिलो वर्ष नै दुईवटा पुल शिलन्यास भएर निर्माण अगाडि बढिरहेको अवस्था छ । अरू अधुरा पुलहरू सम्पन्न भएका छन् । त्यस अलावा वडा नम्बर ११ विजुवापुरमा हामी निर्वाचित भैसकेपछि सुरु गरेको पुल सम्पन्न भैसकेको छ । कालिमा चक्रपथ मै भएको पुल सम्पन्न भएको छ । वडा नम्बर ४ कुस्मामा म निर्वाचित भैसकेपछि सुरु गरेको लुम्बिनी सडकको पुल सम्पन्न भैसकेको अवस्थामा छ । अरू पुलहरू पनि हामीले निर्माण गरिराखेका छौं । विकास भएको देखिनका लागि पनि पूर्वाधारको विकास हुनुपर्ने रहेछ । यस अलावा स्वास्थ्यमा पनि हामीले निरन्तर सुधार गर्दै अगाडि बढेका छौं ।

सैनामैना नगरपालिकामा स्वास्थ्य चौकीमा सुत्केरी हुने महिलाहरूका लागि नेपाल सरकारले दिएको सेवा सुबिधा बाहेक आउनजानको लागि एम्बुलेन्स निःशुल्क गरेका छौं । त्यतिमात्र होइन, जेष्ठ नागरिक, विपन्न, पीछडिएको वर्ग जो छ, रूपन्देहीका अस्पतालहरूमा उपचारका लागि जाने व्यक्तिहरूका लागि निःशुल्क एम्बुलेन्सको व्यवस्था गरेका छौं । वास्तवमा यो अत्यन्त महत्वपूर्ण कुरा रहेछ । जनताले यस्तै कामबाट यो हाम्रो सरकार रैछ भन्ने खालको अनुभूति गरेका छन् ।

त्यतिमात्र नभएर अहिले सैनामैना नगरपालिकाको स्वास्थ्य सेवा केन्द्रबाट रेविजको भ्याक्सिन हामीले सुरुवात गरेका छौं । धेरै पालिकामा रेविजको भ्याक्सिन लगाइएको छैन । यो हाम्रो थप सुविधा हो । अहिलेको रेकर्ड अनुसार ११ सय जना कुकुरले टोकेका बिरामीले रेविजको भ्याक्सिन लगाएका रैछन् । त्यसलाई मध्यनजर राखेर अहिले सैनामैना नगरपालिकाले कुकुरलाई रेविज खोप दिने र बन्ध्याकरण गर्ने काम गरिरहेका छौं । अझै पनि धेरै कुकुरहरू बाँकी छन् । आगामी दिनमा पनि हामीले यो कार्यक्रमलाई निरन्तरता दिएर अगाडि बढाउने छौं । त्यसका अलावा कृषिमा पहिलो ५० प्रतिशत अनुदान दिइराखेका थियौं, त्यसलाई थप गरेका छौं । बिउ वृद्धिका कार्यक्रमहरू गरिरहेका छौं । आलु, मकैका पकेट क्षेत्र निर्माण र बाख्राको पनि पकेट क्षेत्र निर्माण गरिराखेका छौं । सैनामैनाको एउटा महत्वपूर्ण कार्य अहिले सैनामैनामा एउटा शीतभण्डारको निर्माण भएको छ । संघीय सरकार र नगरपालिकाको संयुक्त रूपमा करोडौं लागतमा यो निर्माण भएको छ । त्यस अलावा यसको बजार व्यवस्थापन कसरी गर्ने भनेर पनि हामी लागिराखेका छौं ।

नगरपालिकाले काम गरिहँदा नीतिगत र व्यवहारिक कठिनाई छन् कि छैनन् ?
-वास्तवमा हामीलाई व्यवहारिक कठिनाई केही हुँदो रहेनछ । एउटा नेताले चाहेको योजनाहरू गाउँमा लिएर गएर त्यसलाई सम्पन्न गर्न गाह्रो रहेछ । जनताले चाहेका योजनाहरू सम्पन्न गर्न केही कठिनाई रहेनछ । त्यसकारण हामीले जनताका आवश्यकताअनुसारका योजनाहरू नै अगाडि बढाएका छौं । यसमा कुनै समस्या छैन । à