खोज

कपिलवस्तु, १५ माघ।

कपिलवस्तुको तौलिहवामा आत्महत्या न्यूनिकरण तथा रोकथाम सम्बन्धी सचेतनामूलक कार्यक्रम शुरु गरिएको छ। कपिलवस्तु नगरपालिकाको सहयोगमा जिल्ला प्रहरी कार्यालय कपिलवस्तु र सामुदायिक प्रहरी सेवा केन्द्र तौलिहवा कपिलवस्तुको संयुक्त आयोजनामा समुदाय–प्रहरी साझेदारी कार्यक्रम अन्तर्गत तौलेश्वरनाथ संस्कृत मावि तौलिहवाबाट अभियान शुरु गरिएको हो। सो अवसरमा बोल्दै कपिलवस्तु नगरपालिकाका प्रमुख सुदिप पौडेलले कार्यक्रमले समाजमा आत्महत्या न्यूनिकरण बारे सचेतना प्रवाह गरी आत्महत्याको दर घटाउन भूमिका खेल्ने बताए। युवामा बढ्दो नैराश्यता रोक्न परामर्शयुक्त सचेतना आवश्यक रहेको स्पष्ट पार्दै उनले बालविवाह न्यूनिकरण र लागु पदार्थको दुव्र्यसनी रोक्न सचेतना अभिवृद्धिमा सहकार्य गर्न आवश्यक रहेकोमा जोड दिए। विद्यालयस्तरबाट किशोर किशोरीलाई प्रवाह गरिने सचेतना प्रभावकारी हुने उनले बताए। जिल्लामा आत्महत्याको विषय जटिल र गम्भीर बन्दै गएकोले परिवार, समाज र सबै सरोकारवाला सजग हुनु पर्नेमा प्रमुख जिल्ला अधिकारी विश्व प्रकाश अर्यालको जोड थियो। दुई साता चल्ने सचेतना अभियानमा सबै पक्षको भूमिका रहेकोले यसलाई अभियानको रूपमा अगाडि बढाईएको प्रजिअ अर्यालले स्पष्ट पारे। छिमेकी देश भारतमा आत्महत्याको दर विश्वमै बढी मध्य रहेकाले सोको प्रभाव मूल्याङ्कन गरेर न्यूनिकरणका उपायका लागि सहकार्य गरिनु पर्ने उनले सुझाव दिए। पछिल्लो समय किशोरावस्थामा आउने नैराश्यता, एन्जाइटी, डिप्रेशन र हार्मोनल इफेक्टका कारण आत्महत्याका लागि युवाहरू प्रोत्साहित हुने भएकाले मनोसामाजिक विमर्श, प्रेरणादायी उत्प्रेरणा प्रवाहमा सहकार्य आवश्यक रहेको जिल्ला प्रहरी कार्यालय कपिलवस्तुका प्रहरी प्रमुख प्रहरी उपरिक्षक निरञ्जनदत्त भट्टले बताए। जिल्लामा झुण्डिएर र विष सेवन गरेर आत्महत्या बढी हुने भएकाले विषादीको खुल्ला बिक्री वितरणलाई प्रोत्साहित गर्ने पक्षलाई नियन्त्रण गर्न आवश्यक रहेकोमा उपरिक्षक भट्टले जोड दिए। जिल्लामा आत्महत्याको दरभन्दा आत्महत्याका लागि प्रयास गर्नेको संख्या बढी रहेकाले सचेतना र परामर्श प्रभावकारी हुने उनको ठम्याई थियो। कपिलवस्तु नगरपालिकासँगै अन्य स्थानीय तहसँग सहकार्य गरेर शान्तिपूर्ण र सुरक्षित समाज निर्माणमा प्रहरीले भूमिका खेल्ने उनले बताए।

सो अवसरमा जिल्लाको आत्महत्याको अवस्था प्रस्तुत गर्दै अभियानका संयोजक रहेका प्रहरी निरीक्षक माधव विश्वकर्माले सचेतनाका लागि जिल्लाका स्थानीय तहसँग समन्वय गरिएको जनाए। चालु आर्थिक वर्षको हालसम्म ९४ वटा, गत आर्थिक वर्षका १ सय १० वटा र अघिल्लो आर्थिक वर्षमा जिल्लाभर १ सय १४ आत्महत्याको घटना भएको उनले जानकारी दिए। त्यसैगरी चालु आवको हालसम्म जिल्लाभर १ सय ४२, गत आवमा १ सय ६५ र अघिल्लो आवमा १ सय ३४ आत्महत्या उद्योगको घटना भएको देखिएकोले सबै पक्ष गम्भीर भएर सचेतना प्रवाह गर्नु पर्ने उनले बताए। अभियानले आत्महत्याको दरलाई न्यूनिकरण गर्न आत्महत्या रोकथामको उपाय बारे नागरिकलाई सुसूचित गरेर मृत्युदर घटाउन भूमिका खेल्ने उनको भनाई थियो। लघु सचेतना कार्यक्रम माघ १५ देखि माघ मसान्तसम्म नगरका १२ वडाका टोल विकास, समूह, विद्यालय, बसपार्क र पार्क लक्षित गरी सञ्चालनमा ल्याइने निरीक्षक विश्वकर्माले जनाए। कार्यक्रमको सत्रमा जीवन बारे उत्प्रेरणा जगाउने प्रस्तुतीकरण सहित दुई घण्टा सम्म हुने सचेतना कार्यक्रममा नगरका सबै वडाका १ हजार २ सय बढी नागरिक सचेत हुने लक्ष्य राखिएको उनले स्पष्ट पारे। कार्यक्रममा प्रहरी उपरिक्षक भट्ट, नगर प्रमुख पौडेल, प्रजिअ अर्याल सहित सशस्त्र प्रहरी उपरिक्षक रामजंग पाण्डे, जिल्लाका प्रमुख अनुसन्धान अधिकारी दिनेश पोख्रेल, सामुदायिक प्रहरी सेवा केन्द्र तौलिहवाका अध्यक्ष देवी प्रसाद वर्मा लगायतको सहभागीता रहेको थियो।