खोज

बुटवल, १३ जेठ ।

शंकरनगर वन विहार तथा अनुसन्धान केन्द्र वनवाटिकामा रहेको ई–लाइब्रेरी सञ्चालनमा आउन सकेको छैन । रोटरी क्लव अफ बुटवलको अगुवाइमा ०७७ फागुन महिनाबाट निर्माण सुरू गरिएको ई–लाइब्रेरी आन्तरिक रूपमा पूर्ण नहुँदा सञ्चालनमा आउन नसकेको हो ।

निर्माण सुरू भए लगत्तै कोभिड –१९ को समयमा भएको लकडाउनले प्रभावित भएको थियो । लकडाउन पश्चात हाल निर्माण सम्पन्न भए पनि आन्तरिक काम अझै बाँकी हुँदा सञ्चालनमा आउन सकेको छैन । साढे २२ फिट चौडाई र साढे २५ फिट लम्बाई रहेको सो ई–लाइब्रेरीको निर्माण कार्य सम्पन्न भएको तर आन्तरिक काम अगाडि नबढेको वनवाटिकाका उपाध्यक्ष खिमलाल पाण्डेले बताए ।

शंकरनगर सामुदायिक वनअन्तर्गतको वनवाटिकाको रोटरी चाइल्ड डेभलपमेन्ट सेन्टरभित्र निर्माण गरिएको सो ई–लाइब्रेरीमा करिब २४ लाख रकमको ठूलो प्रोजेक्टर समेत जडान गरिसकिएको छ । जहाँ फर्निसिङ, रंगरोगन, बिजुली र इन्टरनेट जडानको कार्य भैसकेको रोटरी क्लव अफ बुटवलका वर्ष २३÷२४ का अध्यक्ष बोनिन पियाले बताए । सो लाइब्रेरीमा तिलोत्तमा नगरपालिकाको रू १५ लाख लागतमा भवन निर्माण र वनवाटिकाको कार्यालयले फिनिसिङको काम सम्पन्न गरेपनि आन्तरिक कामहरू अघि बढ्न नसकेको वाटिका उपाध्यक्ष पाण्डेले बताए ।

ई–लाइब्रेरीमा प्रोजेक्टरको माध्यमबाट वनवाटिकाभित्रका गतिविधिहरूको जानकारी दिने उद्देश्य रहेको उनले बताए । साथै तिलोत्तमा नगरपालिकाभित्र रहेका पर्यटकीय क्षेत्रको बारेमा सोही प्रोजेक्टरकै माध्यमबाट श्रव्यदृश्य सामग्रीको प्रदर्शन गरिने वनवाटिकाका अध्यक्ष बेल प्रसाद शर्माले जानकारी दिए ।

अझ महत्वको कुरा त सो ई–लाइब्रेरीमा सौर्य मण्डल बनाउने उद्देश्य रहेको छ । करिब ३ करोडको लागतमा बन्ने सौर्य मण्डल के, कति र कुन उमेर समूहलाई लक्षित गरी बनाउने भन्ने अन्योलका कारण काम अगाडि बढ्न नसकेको रोटरी क्लव अफ बुटवलका पूर्व अध्यक्ष डाक्टर तारा प्रसाद उपाध्यायले बताए ।

सौर्य मण्डल निर्माणका लागि इन्जिनियरिङ जियोलोजिकल सर्वे गर्नुपर्ने पूर्व अध्यक्ष उपाध्यायले बताए । सो को लेखन कार्य पनि अघि बढिरहेको र आर्थिक स्रोत जुटाउन पनि लागि परेको उपाध्यायले बताएका छन् । आर्थिक स्रोतका लागि रोटरीयन, रोटरी इन्टरनेशनल (म्याचिङ ग्राण्ड) र तिलोत्तमा नगरपालिका लागि परेको डाक्टर उपाध्यायले बताए । सोही कारण सञ्चालनमा ढिलाइ भएको र यसमा छलफल अघि बढिरहेको रोटरी अध्यक्ष पियाको भनाइ छ ।

तिलोत्तमा नगरपालिका वाड नम्बर १ र २ अन्तर्गतको शंकरनगर सामुदायिक वन उपभोक्ता समूहको ५७६ हेक्टर क्षेत्रफलमध्ये यसले ५१.३४ क्षेत्रफल वनवाटिकाले ओगटेको छ । २०६२ सालमा शंकरनगर सामुदायिक वन उपभोक्ता समूहका अध्यक्ष उमानाथ कंडेलको पहल र सकृयतामा सुरू भएको यस वाटिका सुरूवात भन्दा आकाश जमिनको भिन्नता छ ।

शंकरनगर वनविहार तथा अनुसन्धान केन्द्र (वनवाटिका) काममा हाल धेरै चिज मुख्य आकर्षणका रूपमा रहेका छन् । गतवर्ष मात्रै नेपाल सरकारले मुलुकभरका सय पर्यटकीय क्षेत्रमध्ये यसलाई पनि समावेश गरेसँगै संघीय सरकारले पनि थप लगानी गर्ने यहाँका नागरिकको अपेक्षा छ ।

जंगली जनावर र चराचुरूङ्गी गरी हाल विभिन्न २१ प्रजातिका जनावरहरू यहाँ रहेका छन् । यस मनोरञ्जनात्मक वाटिकामा गत चैत्र महिनामा मात्रै आकर्षक बहुउद्देश्यीय भ्यू टावरको उदघाटन भएको छ । यसले पनि वनवाटिकालाई थप आकर्षक प्रदान गरेको छ । यहाँ रेल, शहीद पार्क, पुष्पलाल पार्क विपि पार्कजस्ता छ वटा पार्क, चिल्ड्रेन पार्क रहेका छन् ।