खोज

बुटवल, २९ चैत ।
नेपाली क्रिकेट टिमका ओपनर कुशल भुर्तेलले अलराउन्डर दीपेन्द्र सिंह ऐरीको नाममा रहेको राष्ट्रिय कीर्तिमान तोड्दै आफ्नो नाममा लेखाएका छन् । खराब प्रदर्शनबाट गुज्रिरहेका भुर्तेलले पुनः उत्कृष्ट लयलाई कायम राखेका छन् ।
बिहीबार बिहान भएको टी–२० सिरिजअन्तर्गत कुवेतविरुद्धको खेलमा भुर्तेलले ५० बलमा ८१ रन बनाउँदा नेपालका लागि सबैभन्दा बढी अर्धशतक बनाउने कीर्तिमान रचेका हुन् । यसअघि यो कीर्तिमान दीपेन्द्रको नाममा थियो । दीपेन्द्रले टी–२० मा १० अर्धशतक प्रहार गरेका छन् । तर भुर्तेलले कुवेतविरुद्ध अर्धशतक बनाएसँगै उनको अन्तर्राष्ट्रिय अर्धशतक ११ पुगेको हो ।

टी–२० अन्तर्राष्ट्रियमा कुशल र दीपेन्द्र दुवै समान एक एक सतक प्रहार गरेका छन् । ५४ खेल खेलेका कुशलले नटआउट १०४ र ६६ खेलमा ब्याटिङ गरेको दीपेन्द्रले नटआउट ११० रन बनाएका छन् । कुवेतविरुद्ध नै अर्धशतक बनाएका ओपनर आसिफ शेख पनि ७ अर्धशतकसहित तेस्रो स्थानमा छन् । कप्तान रोहित पौडेलको पनि समान ७ अर्धशतक छ । त्यसपछि पूर्वकप्तान पारस खड्का र कुशल मल्लले समान ५ अर्धशतक प्रहार गरेका छन् ।

नेपाल र कुवेतबीच अहिलेसम्मकै उच्च स्कोर बनेको खेलमा नेपालले १८६ रनको लक्ष्य पूरा गरेको थियो । यो खेलमा दुवै टोलीको गरी ३७१ रन बन्यो। टी–२० मा एकै खेलमा यी दुई टोलीले बनाएको यो नै उच्च स्कोर हो । कुवेतले दिएको १८६ रनको लक्ष्य नेपालले ७ बलअघि नै मात्रै ४ विकेटको क्षतिमा पूरा गरेको हो । नेपालको जितमा कुशल भुर्तेलले ५० बलमा ८१ रनको विस्फोटक इनिङ्स खेले । उनले ६ चौका र ६ छक्काको मद्दतमा उच्च स्कोर बनाउँदा अर्का ओपनर आसिफ शेखले पनि अर्धशतक पूरा गरे । आसिफले ३८ बलमा ५३ रन जोडे । उनले २ चौका र ४ छक्का प्रहार गरे । कुशल मल्ल ४ रनमा आउट हुँदा दीपेन्द्र सिंह ऐरीले मात्रै १२ बलमा ३१ रनको योगदान गरे । कप्तान रोहित पौडेल ४ र गुल्सन झा ९ रनमा नटआउट रहे ।