खोज

गुल्मी, २९ चैत ।
गुल्मीको ऐतिहासिक, धार्मिक तथा पुरातात्विक स्थल मुसिकोट दरबारको संरक्षणमा नेपाली सेनाले साथ दिएको छ । सेनाको मध्यपश्चिम पृतनाको आयोजना, २२ बाहिनी अड्डा बुटवलको संरक्षण तथा राम बाण गुल्मका सेनानी तिलक केसीको नेतृत्वमा दरबार क्षेत्रमा मेशिनरी वाल तथा रेलिङ् निर्माणसँगै रङ्रोगन समेत गरिएको छ ।

मुसिकोट दरबारमा २० मिटर लम्बाईको वाल र २१ मिटरको रेलिङ् निर्माण गरिएको राम बाण गुल्मका सेनानी तिलक केसीले जानकारी दिएका छन । दुवै संरचना नेपाली सेनाका मध्यपश्चिम पृतनाका पृतनापती उपरथी प्रेम बहादुर पुनले एक कार्यक्रमका बीच मुसिकोट नगरपालिकाका प्रमुख जीवलाल खरेल जीवनलाई हस्तान्तरण गरेका हुन । कार्यक्रममा बोल्दै उपरथी पुनले जनहित कार्यक्रम अन्तर्गत सेना र नागरिकको सम्बन्धलाई थप सुदृढ बनाउन क्वीक इम्प्याक्ट प्रोजेक्ट योजना अन्तर्र्गत सेनाले सामाजिक काम गर्दै आएको बताए ।

उनले ऐतिहासिक एवं पुरातात्विक स्थलको संरक्षण एवं पर्यटन प्रवद्र्धन गर्ने उद्देश्यले नेपाली सेनाले मुसिकोट दरबारमा थोरै भएपनि भौतिक संरचना निर्माणमा सहयोग गरेको बताए । कार्यक्रममा मुसिकोट नगरपालिकाको तर्फबाट नगर प्रमुख खरेलले मुसिकोटको पहिचानको रूपमा रहेको दरबार क्षेत्रमा नेपाली सेनाले गरेको कामको प्रशंसा गरे ।

उनले तीनै तहका सरकार मार्फत मुसिकोटको विकासमा थुप्रै काम भएको बताउँदै नेपाली सेनाले गरेको कामले थप ईटा थपेको बताएका थिए । नाइसा कन्ट्रक्सन सप्लार्यस प्रालीद्वारा सात लाख ३६ हजार २८३ रूपैयाँको लागतमा उक्त काम सम्पन्न गरिएको हो । कार्यक्रमा वडाध्यक्ष रबिन्द्र केसी, मुसिकोट दरबार व्यवस्थापन समितिका अध्यक्ष लगायतका व्यक्तिहरूले मुसिकोट दरबारको ऐतिहासिक एवं पुरतात्यीक महत्वको बारेमा जानकारी गराएका थिए ।