खोज

बुटवल, २१ चैत । होटल तथा रेष्टुरेण्ट व्यवसायी संघ रुपन्देहीको कोषाध्यक्षमा रामबहादुर न्यौपाने निर्विरोध भएका छन् । यही चैत २४ र २५ गते हुने संघको २२ औ साधारण सभा तथा ११ औ अधिबेशनमा संघको नयां नेतृत्वका लागि भएको मनोनयनमा न्यौपानेको मात्रै उम्मेदवारी परेपछि उनी निर्विरोध भएका हुन् । न्यौपाने बाबुराम गौतम नेतृत्वको प्यानलमा थिए । लेखनाथ भण्डारी प्यानलबाट शिवरोज पोखरेल कोषाध्यक्ष उम्मेदवार हुने भनेर प्रचार प्रसार भएपनि अन्तिम समयमा उनले उम्मेदवारी दर्ता गरेनन् ।
संघको आगामी नेतृत्वका लागि वरिष्ठ उपाध्यक्ष बाबुराम गौतम र प्रथम उपाध्यक्ष लेखनाथ भण्डारी नेतृत्वमा अलग अलग प्यानल बनाएर चुनावी मैदानमा होमिएका छन् ।
अध्यक्षका प्रत्यासी बाबुराम गौतमले आफू वरिष्ठ उपाध्यक्ष भएकाले स्वभाविकरुपमा अध्यक्षको दावेदार भएको भन्दै व्यवसायीका समस्या समाधान र चर्को घर भाडा र दोहोरो करको समस्या समाधान, बुटवलमा पर्यटन कार्यालय स्थापन लगाएतका विषय आफनो प्यानलको एजेण्डा रहेको बताए ।
त्यस्तै अध्यक्षका प्रत्यासी लेखनाथ भण्डारीले प्रदेशको राजधानी बुटवलवाट सरेसंगै यहाँका व्यवसायीले खेप्नु परेकासमस्याको समाधानमा पहल कदमी रहने बताए ।
संघको वरिष्ठ उपाध्यक्षमा माधवकुमार खनाल र टंक प्रसाद पोखरेल, पर्यटन उपाध्यक्षमा रोमाकान्त पाण्डे र चुत्र बहादुर पौडेल , प्रथम उपाध्यक्ष्यमा टंक प्रसाद पराजुली र केशवराज कंडेल , द्धितीय उपाध्यक्षमा खुमराज ज्ञवाली र प्रेमप्रसाद भटराई , महासचिवमा मोहनलाल पाण्डे र अर्जुन थापा, सचिवमा डिल्लीराज अर्याल र थम्मन बहादुर भण्डारी, सह सचिवमा मोहन बस्याल र अर्जुन पोख्रेल तथा सहकोषाध्यक्षमा माधव ढकाल र कृष्ण प्रसाद पाण्डे बीच प्रतिस्पर्धा हुने छ ।
संघको ११ जना कार्यसमिति सदस्यमा पनि दुबै प्यानलबाट गरी २२ जनाको उम्मेदवारी परेको प्रमुख निर्वाचन अधिकृत कृष्ण प्रसाद वस्यालले बताए । संघमा १ हजार २ सय ३ जना मतदाता रहेका छन् ।