खोज

ट्राफिक प्रहरी कार्यालय तुलसीपुरले हर्न बजाउने सवारीलाई कारबाही सुरु गरेको छ । शनिबार देखि सुरु गरेको हर्न निषेधित क्षेत्रमा हर्न बजाउने सवारी साधनहरूलाई कारबाही सुरु गरेको जिल्ला ट्राफिक प्रहरी कार्यालय दाङले जानकारी दिएको छ । आईतबारदेखि हर्न बजाउने ९१ सवारीका साधनहरूलाई कारबाही गरेको ट्राफिक प्रहरी कार्यालय तुलसीपुरका प्रहरी नायब निरीक्षक विवेक महराले जानकारी दिएका छन् । हर्न निषेधित क्षेत्रमा ठूलो स्वरमा हर्न बजाउने सवारीहरू आईतबार ४५ वटा र सोमबार ४६ वटा कारबाहीमा परेको उनले बताए ।
कारबाही परेका मध्ये आईतबार १२ सवारीका साधनलाई पाँच सय रूपैयाँका दरले जरिवाना काट्दा ६ हजार र सोमबार २० वटा सवारीलाई जरिवाना काट्दा १० हजार गरि जम्मा सोह्र हजार राजश्व संकलन गरिएको प्रहरी नायब उपरीक्षक महराले बताए । ति बाहेक अन्य केही सवारीका साधनहरूको कागजात जफत गरिएको छ । कारबाही पर्नेमा सबै भन्दा धेरै मोटरसाईकल रहेको महराले जानकारी दिएका छन् ।
स्थानीय तहको निर्वाचन सम्पन्न भएलगत्तै तुलसीपुर उप महानगरपालिका वडा नं.५ ले बजार क्षेत्रलाई हर्न निषेधित क्षेत्र घोषणा गरेको थियो । तर कार्यान्वयनका लागि वडा कार्यालय, उप महानगरपालिका तथा ट्राफिक प्रहरी कार्यालय सबै मौन रहे ।

तर एक वर्ष पहिलेको निर्णयलाई अहिले उपमहानगरपालिका, प्रदेश प्रहरी कार्यालय र ट्राफिक प्रहरी कार्यालयको सक्रियतामा कार्यान्वयनमा आउने अपेक्षा गरिएको छ ।
हर्न निषेध अभियानलाई प्रभावकारी बनाउन प्रदेश प्रहरीले २० जना र ईलाका प्रहरी कार्यालय तुलसीपुरले ७ जना तथा ट्राफिक प्रहरी कार्यालय तुलसीपुरका १० जना गरि ३७ जनालाई खटाईएको छ । साथै अहिले बाहिरबाट आएका सवारीका सधनहरूलाई जानकारी दिन प्लेकार्ड बोकेर ट्राफिक प्रहरीहरूलाई सडक–सडकमा खटाईएको छ । पैदल यात्रुहरूलाई छेउबाट हिडाउनका लागि बिरेन्द्र चोकमा ट्राफिक कोणहरू राखेर डोरी बाधिएको छ ।
बीरेन्द्र चोकमा बढि भीडभाड हुने भएकोले डोरी बाँधिएको ट्राफिक प्रहरी कार्यालय तुलसीपुरका प्रमुख विवेक महरा बताउँछन् । “सवारी चालक तथा पैदल यात्रुहरूको सडक प्रयोगमा तालमेल नमिल्दा प्रेसर हर्न बजाउनुपर्ने हुन्छ” महराले भने । अहिले पैदल यात्रु तथा सवारी चालकहरूलाई सचेतनामुलक प्ले कार्डहरू समेत वितरण गरीरहेको उनको भनाई छ ।

तीन दिनको अवधिमा ९० प्रतिशत हर्न कम भएको महराले बताए । अहिले सर्वसाधारण नागरीकहरूलाई वाटो काट्न तथा सवारीका साधनहरू चलाउन अप्ठेरो भैरहेको उनीहरू बताउछन् ।
“पहिला पहिला केही थिएन अहिले चौकमा वाटो काट्दा जेव्रा क्रसीङवाट काट्नुपर्छ तुलसीपुरका स्थानीयवासी नारायण बस्नेतले” भने । त्यस्तै सवारीका साधन चलाउनेलाई पनि कम्ती गाह्रो छैन । “वाटोमा हिड्दै गर्दा कस्ताकस्ता मान्छेहरूको सामना गर्नुपर्छ त्यस्तो समयमा पनि हर्न नवजाउनु कस्तो समस्या” सवारी चालक रामवहादुर चौधरीले भने । बजार क्षेत्र भित्र हर्न निशेधित गर्नु राम्रो काम होला तर सानो हर्न पनि नवजाउदा हुनसक्ने हुर्घटनाको जिम्वेवारी कसले लिने यो प्रश्नको उत्तर खोज्नु जरुरी छ