नेपालगञ्ज, ३१ चैत ।
नेपाली कांग्रेसका महामन्त्री विश्वप्रकाश शर्माले पूर्व राजा ज्ञानेन्द्र शाहलाई श्रीपेच चुनाव चिन्ह लिएर चुनावी मैदानमा आउन चुनौती दिएका छन् । नेपाली कांग्रेस, बाँकेको शनिबार नेपालगञ्जमा भएको जिल्ला सम्मलेनलाई सम्बोधन गर्दै महामन्त्री शर्माले निर्वाचनबाट दुई तिहाई ल्याएर संविधान संशोधन गरेर राजसंंस्था फर्काउन समेत चुनौती दिए ।
महामन्त्री शर्माले आफ्नै कर्मले राजाको विदाई भएको भन्दै हिंसात्मक आन्दोलन गरेर राजसंस्था नफर्कने स्पष्ट पारे । ‘आफू चुनाव लड्न नआए अरुलाई उठाएर दुई तिहाई सांसद जित्नुस्, संविधान संशोधन गर्नुस् अनि राजसंस्था फर्काउनुस्’ उनको थप भनाई थियो—‘तर, राजसंस्थाको रेल छुटिसकेकाले अब त्यसमा सवार हुने सम्भावना छैन ।’ पार्टीको महाधिवेशन २०८३ असोजभित्रै हुने बताउदै महामन्त्री शर्माले २०८४ को चुनावपछि महाधिवेशन हुन्छ भन्ने मानसिकता त्याग्न आग्रह गरे ।
उनले पार्टीभित्रको अन्तर्घात अन्त्य गरी अब अन्तरविश्वासको नवीन कांग्रेस बनाउन कार्यकर्ता लाग्नुपर्ने बताए । महामन्त्री शर्माले सरकारको ध्यान सडकको प्रदर्शन भन्दा पनि राम्रो काम प्रस्तुत गर्नेतर्फ केन्द्रित हुनुपर्नेमा जोड दिदै प्रधानमन्त्रीले शिक्षकहरुको आन्दोलनलाई सम्बोधन गर्न गम्भीरता देखाउनुपर्नेमा आफैं सडक आन्दोलनमा भाषण गर्दै हिँड्नु शोभनीय नभएको टिप्पणी गरे ।
सम्मेलनमा नेपाली कांग्रेसका सहमहामन्त्री किशोरसिंह राठौरले नेता–कार्यकर्ता इमान्दार र अनुशासित भएमात्रै पार्टी मजबुत हुने बताए । उनले केही भएको छैन भन्ने भाष्य बनाउन खोजिएको भन्दै त्यसमा सत्यता नभएको जिकिर समेत गरे । केन्द्रीय सदस्य दीपक गिरीले सरकारले संविधान संशोधनको एजेण्डा बोके पनि त्यसतर्फ केन्द्रित हुन नसकेको टिप्पणी गर्दै सुशासन, भ्रष्टाचार नियन्त्रण, रोजगारी लगायतका विषयमा गम्भीर बन्नुपर्ने आवश्यकता औल्याए ।
सम्मेलनमा केन्द्रीय सदस्यहरु मैकुलाल बाल्मिकी, डा. गोपाल दहित, सञ्जय गौतम, लुम्बिनी प्रदेश सभापति अमरसिंह पुनले पनि बोलेका थिए । सम्मेलनमा बाँके कांग्रेसका सभापति नारायणप्रसाद गौडेलले नीति तथा कार्यक्रम, सचिव सुधांशु कोइरालाले सांगठनिक प्रतिवेदन र कोषाध्यक्ष यज्ञबहादुर बस्नेतले आर्थिक प्रतिवेदन प्रस्तुत गरेका थिए । सबै प्रतिवेदन पारित भएको छ । सम्मेलनमा पार्टीका निवर्तमान प्रेस सल्लाहकार एवम् नेपाल पत्रकार महासंघ बाँकेका अध्यक्ष नवीन गिरी, वरिष्ठ पत्रकार जे. पाण्डेसहित स्वतन्त्रता सेनानी, पूर्व जनप्रतिनिधि, जग्गादाता, उत्कृष्ट जनप्रतिनिधि लगायतलाई सम्मान गरिएको थियो । त्यसक्रममा महामन्त्री शर्माले नेपाली कांग्रेस बाँके तथा नेपाल प्रेस युनियन बाँकेको भित्तेपात्रो समेत विमोचन गरेका थिए ।
२ बैशाख २०८२, मंगलवार
