खोज

कपिलवस्तु, १ बैशाख ।

कपिलवस्तु जिल्लाको बुद्धभूमि नगरपालिका वडा नम्बर ९ गब्दहवाका एक युवकको शिकार खेल्ने क्रममा गोली लागेर मृत्यु भएको छ । शनिवार सोही स्थानका २८ बर्षीय समुन्द्र गाहा मगर आफ्नो बाख्रा लिई चराउन गोठाला गएकोमा शिकार गर्ने क्रममा गोली लागी उनी घाइते भएका थिए । घाइते उनलाई थप उपचारका लागि युनिभर्सल मेडिकल कलेज भैरहवामा पुर्याएको अवस्थामा उनको मृत्यु भएको जिल्ला प्रहरी कार्यालय कपिलवस्तुका प्रवक्ता प्रहरी नायब उपरीक्षक मोहनमणी अधिकारीले जानकारी दिए ।

इलाका प्रहरी कार्यालय गोरुसिङ्गेबाट खटिएको प्रहरी टोलीले सो घटनाको बारेमा अनुसन्धान गर्दै जाँदा सोही दिन मृतक गाहा मगरसँगै सोही स्थानका रामबहादुर थारु र कालु भन्ने राम थारु जंगली जनावरको शिकार खेल्न गाउँदेखि अन्दाजी ६ कि.मी. उत्तरतर्फ रहेको कपिलवस्तु र अर्घाखाँची जिल्लाको सिमाना गब्दहवादेखि खैरभट्टी जाने सिमानामा रहेको बुद्ध यशोधरा सामुदायिक बनमा गएको खुल्न आएको छ ।

सोही दिन दिउँसो ४ बजेको समयमा रामबहादुर थारुको भरुवा बन्दुक पड्की समुन्द्र गाहा मगर घाइते भएका थिए । घाइते उनलाई शिकार खेल्न गएका मानिसहरुले घट्नास्थलबाट कसैलाई कुनै जानकारी नै नदिइ भैरहवा मेडिकल कलेजमा उपचारको लागि पु¥याएकोमा चिकित्सकले मृत घोषणा गरेको देखिन आएको छ । प्रहरीले शिकार खेल्न प्रयोग भएका २ नाल भरुवा बन्दुकहरु आइतबार एउटा फायर भएको र अर्को लोडेड अवस्थामा लुकाई छिपाई राखेको अवस्थामा बरामद गरेको छ । घटनामा संगै शिकार खेल्न गएका राम बहादुर थारु, कालु भन्ने राम थारु तथा हातहतियार लुकाउन सहयोग गर्ने प्रवेश थारुलाई नियन्त्रणमा लिई थप अनुसन्धान र कारवाही अघि बढाइएको प्रहरी नायब उपरीक्षक अधिकारीले बताए ।