खोज

हङकङ ।

हङकङमा सम्पन्न चारदेशीय टी–२० अन्तर्राष्ट्रिय क्रिकेट प्रतियोगिताको उपाधि कुवेतले जितेको छ। आज भएको फाइनल खेलमा नेपाललाई ३ रनले पराजित गर्दै कुवेतले उपाधि उचालेको हो। टस जितेर पहिला ब्याटिङ गरेको कुवेतले निर्धारित २० ओभरमा ७ विकेटको क्षतिमा १७४ रन बनायो। उसका लागि रविजा सान्दारुवनले ३६ बलमा ६३ रनको आक्रामक पारी खेले। नेपालका लागि सोमपाल कामी र नन्दन यादवले समान २–२ विकेट लिए।

१७५ रनको लक्ष्य पछ्याएको नेपाल १९.३ ओभरमा १७१ रनमै अलआउट भयो। नेपालका लागि बसिर अहमदले ४३ बलमा ८ चौका र ४ छक्कासहित सर्वाधिक ८० रन बनाए। यस्तै, नन्दन यादवले १४ बलमा ३७ रनको आक्रामक योगदान दिए। नेपालको सुरुवात कमजोर रह्यो। कुशल मल्ल र दीपेन्द्र सिंह ऐरी शून्य रनमा आउट भए भने कप्तान रोहित पौडेल ७ रनमै पेभेलियन फर्किए। ९२ रनमै ८ विकेट गुमाइसकेको नेपाललाई बसिर र नन्दनले सम्हाल्ने प्रयास गरेका थिए।

अन्तिम ओभरमा नेपाललाई जितका लागि ११ रन आवश्यक थियो। तर १९.३ ओभरमा बसिर आउट भएपछि बाँकी रन जोड्न नसक्दा नेपाल ३ रनले पराजित भयो। समूह चरणमा भने नेपालले कुवेतलाई पराजित गरेको थियो। उपाधि भिडन्तमा भने कुवेतले नेपालसँगको हारको बदला लिँदै उपाधि हात पारेको हो। प्रतियोगितामा नेपाल उपविजेता बन्यो।