खोज

बुटवल, ३१ चैत ।

सार्वजनिक तथा निजी सवारी साधनको आवद्धता वृद्धि गर्ने लक्ष्यसहित यातायात मजदूर तथा व्यवसायी भलाई कोष बुटवलले सुरु गरेको ८७ दिने विशेष अभियानमा सवारी साधनको सहभागिता उत्साहजनक देखिएको छ ।

गत माघ ६ गते शुभारम्भ गरिएको यो अभियानमा त्यसयता मात्रै करिव ६०० वटा सवारी साधन भलाई कोषमा आवद्ध भएका छन् । दुई पाँग्रे, चार पाँग्रे र अन्य ठूला सवारी साधनहरु उत्साहजनक रुपमा भलाई कोषमा आवद्ध भएको कोषका अध्यक्ष दिनेश फुल्लेलले जानकारी दिए ।

कोषले यो अभियानलाई ३ भागमा वर्गीकरण गरी कोषमा आवद्ध हुने सवारी साधनको संख्या बढाउने योजना बनाएको थियो । दुर्घटनापछि हुने सम्भावित क्षतिबाट राहत दिलाउनका लागि कोषले थालेको यो अभियानले सार्थकता पाएको अध्यक्ष फुल्लेलले बताए ।

कोषले ८७ दिने विशेष अभियानमा सवारी साधनहरुलाई विशेष छुटको योजना समेत ल्याएको छ । जस अनुसार ठूला गाडीको दर्ता शुल्क २१ सय रुपियाँ लिंदै आएकोमा यो अभियानभर ११ सय कायम गरिएको छ ।

त्यस्तै साना गाडीको दर्ता शुल्क १५ सय लिंदै आएकोमा अभियानभरका लागि ५ सय रुपियाँ कायम गरिएको छ । त्यस्तै नयां सवारी साधनको एकमुष्ट वार्षिक शुल्क काट्नेलाई टिसर्ट प्रदान गरिने छ भने विशेष ८७ दिने अभियानमा सबभन्दा बढी गाडी कोषमा आबद्ध दर्ता गर्नेलाई सम्मान गरिने छ ।

यो अभियान अन्तर्गत गत माघ मसान्तसम्म पाल्पा, स्याङ्जा, कास्की, बाग्लुङ, कुश्मा, बेनी, रुकुम पूर्व, नवलपुर, चितवन, मकवानपुर, पर्सा, सर्लाही, सिराहा, सुनसरी, मोरङ सम्मका विभिन्न स्थानमा भलाई कोषको टोली पुगेको छ । “त्यसक्रममा यातायात व्यवसायी प्रा.लि.तथा यातायात व्यवसायी समिति, विभिन्न प्रकारका यातायातका सवारी साधनका व्यवसायी संघसंग भेट गर्नुका साथै प्रशिक्षण कार्यक्रम संचालन गरिएको थियो ।

त्यस्तै कोषले गत फागुन १ गतेदेखि रुपन्देही जिल्लाका उद्योग वाणिज्य संघ तथा उद्योग संघ लगायतका संघ÷संस्था तथा विभिन्न कलकारखाना, फ्याक्ट्री, सिमेण्ट फ्याक्ट्री, तथा ईट्टाभट्टा लगायत अन्य व्यावसायिक संघ संस्थामा भेटघाट तथा अभियान संचालन गरेको र यो अभियान पनि प्रभावकारी भएको अध्यक्ष फुल्लेलले बताए ।

आगामी बैशाख ३ गते कोषको स्थापना दिवसको दिन अभियान समापन गरिने भलाई कोषले जानकारी दिएको छ । स्थापना दिवसका अवसरमा रक्तदान समेत गरिने र त्यसपछिको मूल समारोहमा धेरै सवारी साधन कोषमा दर्ता गराउनेलाई सम्मानज गरिने छ ।

यातायात मजदूर तथा व्यवसायी भलाई कोष बुटवलले पशुपंक्षीको मृत्युमा पनि लगानी गर्दै आइरहेको छ । त्यस्तै निर्जिव दुर्घटनामा समेत लगानी गरी व्यवसायीलाई दुर्घटनाको झन्झटबाट मुक्त गराउने गरिएको छ । कोषमा वार्षिक मासिक शुल्क बुझाइरहेका सवारी दुर्घटनामा परी अंगभंग भएका असहाय, अपाङ्ग मजदुरहरुलाई मासिक रुपमा कोषले अपाङ्ग मजदुर सहयोग गर्दै आइरहेको छ ।

लुम्बिनी प्रदेशमा दुर्घटनापश्चात यस्ता छन् कोषले दिने सुविधा

दुर्घटनापश्चात जीवित र तेस्रो पक्ष निर्जिवमा सम्पूर्ण खर्च कोषले प्रदान गर्ने छ । त्यस्तै दुर्घटनापश्चात स्वयं आफ्नो गाडी क्षति भएमा पनि कोषले ५० प्रतिशत सम्म निर्जिवमा लगानी गर्ने छ । स्वयं सवारी धनीले निर्जिवमा लगानी गरेको आधा रकम दावीबाट प्राप्त भएपछि प्राप्त रकमको आधा रकम कोषले फिर्ता गर्ने छ ।

मोटरसाईकलको हकमा दुर्घटना पश्चात एकपटकमा औषत खर्च १५ लाखसम्म लगानी गर्छ । दुर्घटनापश्चात यो सुविधा लिनका लागि अनिवार्य रुपमा व्यापक बिमा भएको हुनुपर्छ । तेस्रो पक्षको मात्र बिमा भएको सवारी साधनलाई पहिलो पक्षको लगानी भने कोषले गर्दैन ।

सवारी दुर्घटना पश्चात चालकलाई मुद्दाबाट मुक्त गराउन धरौटी राख्नु परेमा कार्यालयले नै लगानी गर्ने छ ।