खोज

रुकुम पूर्वमा प्रदेश नं. ५ को स्वास्थ्य कार्यालयको उद्घाटन भएको छ । प्रदेश ५ का सामाजिक विकास मन्त्री सुदर्शन बरालले स्वास्थ्य कार्यालयको उद्घाटन गरेका हुन् । प्रदेशमा रहने ६ स्वास्थ्य कार्यालयमध्ये रुकुममा पहिलो पटक कार्यालयको उद्घाटन गरिएको हो । प्रदेश अन्तर्गत रहने ६ वटा स्वास्थ्य कार्यालयहरूमध्ये रुकुममा एकल जिल्ला हेर्ने गरी स्वास्थ्य कार्यालय स्थापना गरिएको हो ।
उद्घाटन कार्यक्रममा बोल्दै मन्त्री बरालले कान्छो जिल्लाको रूपमा रुकुम परिचित भएपनि विकासको हिसाबले अगाडि बढ्ने विश्वास व्यक्त गरे । प्रदेश सरकारले रुकुमको विकासको लागि प्राथमिकतामा राखेर काम गर्ने मन्त्री बरालले बताए । उनले जिल्लामा छिट्टै जिल्ला अस्पताल स्थापना गर्ने र त्यसको प्रक्रियाका लागि आफूहरू लागिपरेको जानकारी गराए ।
कार्यक्रममा भौतिक पूर्वाधार विकास समितिका संयोजक आशा स्वर्णकार, प्रदेश सांसद तेजप्रकास वली, जिल्ला समन्वय समिति, रुकुम पूर्वका संयोजक कैलाश वली लगायतले रुकुमको स्वास्थ्यको अवस्था र विकासको बिषयमा बोलेको मन्त्रीका स्वकीय सचिव यदु ज्ञवालीले जानकारी दिए ।
सामाजिक विकास मन्त्रालयका स्वास्थ्य सेवा महाशाखाका प्रमुख डा. उमाशंकर प्रसाद चौधरीका अनुसार प्रदेश अन्तर्गत रहने ६ वटा स्वास्थ्य कार्यालयहरूमा रुकुममा एक, अर्घाखाँची, कपिलवस्तु र दाङ हेर्ने गरी दाङमा, बाँके र बर्दिया हेर्नेगरी बाँकेमा, नवलपरासी र रूपन्देहीलाई हेर्ने गरी रूपन्देहीमा, पाल्पा र गुल्मी हेर्ने गरी पाल्पामा र प्यूठान र रोल्पामा हेर्ने गरी प्यूठानमा स्वास्थ्य कार्यालय प्रस्ताव गरिएको छ । à