खोज

गुल्मीको एक क्लवका बालवालीकाहरूले आफ्नोे खाजा खर्चबाट कटाएर संकलन गरेको रकमले अपांगताको क्षेत्रमा सहयोग गरेका छन् । सदरमुकाम तम्घास स्थित राधा माधव समिति अन्तर्गत गठित डिभाईन युथ क्लवले संकलन गरेको उक्त रकमवाट संस्थालाई आवश्यक सामग्री खरिद गरि हस्तान्तरण गरेका हुन् । गुल्मी जिल्लामा लामो समयदेखि अपांगताको क्षेत्रमा काम गर्दै आईरहेको आशा अपांग केन्द्रलाई ती वालवालीकाहरूले क्लवको तर्फवाट एकथान भ्याकुमक्लीनर खरिद गरि एक कार्यक्रमका वीच संस्थाकी उपाध्यक्ष गंगा रायमाझीलाई हस्तान्तरण गरेका हुन् । सोही कार्यक्रममा संस्थामा रहेका अन्य अपांगता भएका व्यक्ति र बालबालिकाहरूलाई फलफूल समेत वितरण गरेका थिए ।
संस्थाको कार्यालयमै पुगेर उनीहरूले सहयोग सामग्री हस्तान्तरण मात्र गरेनन्, सामग्री हस्तान्तरणपछि अपांगता भएका बालवालीकाहरूसँग भजनकिर्तन गाएर खुसि समेत साटासाट गरेका थिए । खाजाखर्च कटाएर थोरै थोरै जम्मा गरेको रकमलाई सामाजिक काममा लगाउने उद्देश्य साथ उनीहरूले समय समयमा यस्ता प्रकारका सहयोग गर्ने काम गर्दै आईरहेको सो क्लवका गुल्मी संयोजक सुर्यमान थापाले बताए । क्लवले जिल्लामा विपन्न वर्गका छात्रछात्राहरूलाई निशुल्क रूपमा शैक्षिक सामग्रि वितरण, जिल्लामा संचालित निशुल्क स्वास्थ्य शिविरहरूमा स्वयं सेवकको जिम्मेवारी वहन, दूव्र्यसनीमा परेका युवायुवतीहरूका लागि काउन्सिलिङ, विपन्न विद्यार्थी र वालवालीकाहरूलाई झोला तथा न्यानो कपडा वितरण लगायतका क्षेत्रमा सामाजिक काम गर्दै आइरहेको छ ।
हाल ४५ जना बालबालिकाहरू रहेको उक्त क्लव जिल्लामा क्रियाशिल क्लवको रूपमा परिचित रहेको गुल्मी उद्योग वाणिज्य संकका महासचिव ताराप्रसाद भुसालले बताए । सामाजिक सहयोगको पबित्र भावना अनुसार गत दुईवर्ष अघि गुल्मीमा उक्त क्लवको स्थापना गरिएको थियो । अपांगताको क्षेत्रमा ती बालबलिकाहरूले गरेको सहयोगबाट आफूहरू निकै उत्साहीत बनेको भन्दै संस्थाको तर्फबाट उपाध्यक्ष गंगा रायमाझीले क्लवका बालबालिकाहरूलाई धन्यवाद दिएकी थिइन् ।