खोज

तिलोत्तमा,४ मंसिर ।

रुपन्देही १ मा ५४ स्थानका १५४ मतदान केन्द्रमा मतदान भइरहेको छ । बिहानको समयमा मतदान केन्द्रहरुमा मतदाताको उपस्थिति पातलो छ । रुपन्देही १ मा देवदह नगरपालिका, तिलोत्तमा नगरपालिकाका ७, ८, ९, १०, ११, १२, १५, १६ र १७ नम्बर वडा तथा ओमसोतिया र रोहिणी गाउँपालिकाका पुरै वडा गरी यहां कुल ३३ वडा छन् ।

निर्वाचन आयोगका अनुसार रुपन्देही–१ मा १ लाख ३९ हजार ५ सय ६० मतदाता छन् । ती मध्ये रुपन्देही–१ (१) मा ७२ हजार दुई सय ११ र १ (२) मा ६७ हजार तीन सय ४९ मतदाता रहेका छन् । रुपन्देही–१ म प्रतिनिधि सभातर्फ २१ जना उम्मेदवार रहेका छन् । प्रदेश सभा १ मा ११ र २ मा १४ जना उम्मेदवार रहेका छन् ।

यो क्षेत्रमा प्रतिनिधिसभातर्फ नेकपा एमालेका सचिव छविलाल विश्वकर्मा र एमाले छाडेर सत्ता गठबन्धनको उम्मेदवार बनेका घनश्याम भुसालबीच मुख्य प्रतिस्पर्धा छ । एमालेलाई राप्रपा र जसपाको साथ छ ।

प्रदेश सभा तर्फ क मा राप्रपाका आशिषकुमार चौधरी र ख मा एमालेका दधिराम न्यौपाने तथा कांग्रेसबाट विश्वनाथ यादव र अब्दुल रज्जाक उम्मेदवार छन् ।

जाडो मौसम भएकाले अधिकांश मतदाताहरु खाना खाएर दिउसोमा भोट हाल्न आउने भएकाले बिहानमा उपस्थिति पातलो भएको तिलोत्तमा ११ शिवपुर मावि मतदान केन्द्रका निर्वाचन अधिकृत लेखनाथ पोखरेलले बताए ।तस्विरः टिआर शर्मा