खोज

छाडा चौपाया व्यवस्थापन गर्ने नाममा नेपालगन्ज उपमहानगरपालिकाले यहाँका गाई, गोरुहरू तस्करको हातमा जिम्मा लगाउने गरेको पाइएको छ । नेपालगन्जमा रहेका छाडा गोरुहरू जम्मा गरेर ईलामको पशुपतिनगर लैजान लागिएका ५७ वटा गोरु सहित दुईवटा ट्रक मंगलबार राती ११ बजे बाँकेको कुसुमबाट नियन्त्रणमा लिएपछि यस्तो रहस्य पत्ता लागेको हो । ती गोरुहरू तस्करी गरेर इलामको पशुपति नगर लैजाने क्रममा आफूहरूले नियन्त्रणमा लिएर प्रहरीलाई बुझाएको युवा संघ बाँकेका अध्यक्ष किशोर थापाले जानकारी दिएका छन् । गोरु लैजाँदै गरेका ट्रक चालकसंग भेटिएको भेटनरी प्रमाणपत्रमा उक्त गोरुहरू नेपालगन्ज उपमहानगरपालिकाले पठाएको उल्लेख छ । पठाउने फर्म, ह्याचरी र उद्योगको नाममा नेपालगन्ज उपमहानगरपालिका उल्लेख गरिएको छ भने छाप पनि नेपालगन्ज उपमहानगरपालिकाकै लागेको छ ।
भेटनरी प्रमाणपत्रमा पाउनेको नाममा मेचीकाली एग्रीकल्चर उल्लेख छ । यो कम्पनी इलामको पशुपति नगरको हो ।
भेटनरी प्रमाणपत्रमा नेपालगन्ज उपमहानगरपालिकाको तर्फबाट गोरु स्वस्थ्य रहेको कबोल गरिएको छ । ‘नेपालगन्ज उपमहानगरपालिकाले नै छाडा चौपाया तस्करको हातमा सुम्पिने गरेको पाइएको छ । यस्तो कुरा थाहा पाएपछि हामीले कुसुममा राती रोकेका हौं ।
सबै छाडा पशु प्रहरीलाई बुझाएका छौं,’ थापाले भने । २०७५ साउन ३१ गते जारी गरिएको भेटनरी प्रमाणपत्रमा पशु चिकित्सक डा. बेदबहादुर केसीले प्रमाणित गरेका छन् । साउन ३१ गते भेटनरी प्रमाणपत्र पाएपछि ढुवानी भने त्यसको पाँचदिन पछि गरिएको छ । गोरु लैजान स्वीकृत पाएको पाँच दिनसम्म नेपालगन्जमै रहनुले पनि घटना शंकास्पद बनाएको थापाले बताए । गोरु नियन्त्रणमा लिने क्रममा त्यसका मालिक फरार भएको थापाले जानकारी दिए । नेपालगन्ज उपमहानगरपालिका भित्र छाडाचौपाय नियन्त्रण चुनौतीपूर्ण बनेको छ । तर बिना कुनै निर्णय कर्मचारीहरूले छाडा चौपाय तस्करको जिम्मा लगाउने गरिएको स्रोतको दाबी छ । छाडा पशु नियन्त्रणका लागि समिति समेत बनेको छ ।
त्यसले कुनै निर्णय नै नगरेको अवस्थामा चौपाय अन्यत्र पठाउने गरिएको हो । यसबाट कर्मचारीलाई मनग्ये आम्दानी भइरहेको छ । भेटनरी प्रमाणपत्रमा पठाउनेको नाममा नेपालगन्ज उपमहानगरपालिका र त्यसको छाप उल्लेख भएपनि नेपालगन्ज उपमहानगरपालिका निरिक्षण शाखाका प्रमुख पवन कनोजियाले छाडा चौपाय कसैको जिम्मा नलगाइएको दाबी गरे । उनले आफू उपचारका लागि बाहिरबाट बुधवार मात्र आएकाले सबै कुरा बुझ्न नपाएको बताएका छन् । यहाँबाट यसरी ईलाम पु¥याईएका गोरु बंगलादेशसम्म तस्करी हुने गरेको छ ।