खोज

प्यूठान नगरपालिका–७ मा निर्माणधिन टिकुरी बसपार्क झिमरुक खोलाको जोखिममा परेको छ । खोलाको बहाव दिनप्रतिदिन बढ्दै जानथालेपछि बसपार्क जोखिममा परेको हो । बसपार्कदेखि तलपट्टी नदी नियन्त्रण नहुँदा दिनानुदिन खोलाले कटान गर्दै जान थालेको छ । टिपर हिड्नका लागि निर्माण गरिएको वैकिल्पक सडक समेत खोलाले कटान गरिरहेको छ । खोलाको बहाव उच्च हुँदै गएमा निर्माणधिन बसपार्कमा खोलो पस्नसक्ने खतरा देखिएको स्थानीयले बताए । ‘टिकुरी बसपार्क खोलाको खतरामा देखियो’,टिकुरीका स्थानीय बयोवृद्ध मिन बहादुर भट्टले भने,‘खोलामा तटवन्ध गर्नुपर्छ ।’ बसपार्कसँगै यस क्षेत्रका धेरै किसानहरुको खेत खोलाले कटान गर्नसक्ने जोखिम देखिएको उनको भनाई छ । सम्वन्धित निकायलाई विपतमा चनाखो बनेर काम गर्नसमेत उनले ध्यानाकर्षण गराए ।
प्यूठान नगरपालिकाले बसपार्क क्षेत्रमा नदी नियन्त्रण गर्न ३० लाख रुपैयाँ बजेट समेत छुट्टाएको छ । लेकाली निर्माण सेवा खलंगा प्यूठानले तटवन्धन गर्ने जिम्मा पाएको छ । तर, निर्माण व्यवसायीले समयमै काम सुचारु नगरेको नगरप्रमुख अर्जुनकुमार कक्षपतीले जानकारी गराए । ‘बसपार्कलाई लक्षित गरी नदी नियन्त्रणमा बजेट हालेका हौँ’,उनले भने,‘समयमै काम नहुँदा समस्या भयो ।’
शहरी विकास तथा भवन डिभिजन कार्यालय रोल्पा मार्फत बसपार्क निर्माण गर्न थालिएको हो । आगामी आर्थिक वर्षभित्र सम्पन्न गर्नेगरी जयवुद्द–हिलटप–इसान जेभीले निर्माणको जिम्मा पाएको छ । भ्याट बाहेक तीन करोड ५२ लाख रुपैयाँ लागतमा निर्माण पुरागर्ने सम्झौता भएको निर्माण व्यवसायी नविन कुमार श्रेष्ठले जानकारी गराए । ‘खोलाको त्रास छ’,उनले भने,‘नगरपालिकालाई तटवन्धन गर्न भनेका छौँ ।’ बसपार्कलाई सुरक्षित बनाउनका लागि तटवन्धनको कामलाई तत्कालै अघि बढाउन उनले माग गरे । टिकट घर, सार्वजनिक शौचालय सहितको बसपार्कमा दैनिक करिव ६० वटा बसहरु अट्न सक्ने क्षमता छ । ९२ मिटर लम्वाई, चौढाइको क्षेत्रफल जग्गामा निर्माण कार्य भइरहेको छ ।
टिकुरीमा बसर्पाक निर्माण भएपछि बाग्दुला बजारको अव्यवस्थित पार्किङ समस्या समाधान हुनेमा स्वर्गद्धारी सार्वजनिक यातायात व्यवसायी समितिका महासचिव चन्द्रमान श्रेष्ठले आशा व्यक्त गरे । ‘बाग्दुलाको टिकट काउण्टर टिकुरीमा सार्छौ’,उनले भने,‘छिटो बसपार्क बनोस् भन्ने चाहाना छ ।’ जिल्लाका गाउँगाउँमा मुख्य बजारकेन्द्र बाग्दुलाबाट बस, जिपहरु छुट्ने गरेका छन् । जिल्लाको यातायात क्षेत्रकै ‘ट्राञ्जिट प्वाइन्ट’को रुपमा विकसित हुँदै गएको बाग्दुला बजार क्षेत्रमा सवारीको चाप दिनप्रतिदिन बढ्दै जान थालेको छ । बस, जिप, मोटरसाइकल सडकमै पार्किङ हुने गरेको छ । साँघुरो सडकमै अव्यवस्थित पार्किङ भएपछि ट्राफिक प्रहरीलाई समेत चुनौती थपिएको छ ।

झिमरुक खोलाको जोखिममा निर्माणधिन टिकुरी बसपार्क । तस्विर ः केशर रोका