खोज

नेपालगञ्ज, १५ असोज ।

जब नेपालगञ्जमा धार्मिक एवं सामाजिक सदभाव खलबलिने अवस्था सृजना हुन्छ तब सबै धर्मका धर्मगुरुहरु एक ठाउँमा उभिने गरेका छन् । सामाजिक संजाल फेसबुकमा ब्यक्त स्टाटसलाई लिएर आइतवार नेपालगन्जमा भएको प्रदर्शनपछि उत्पन्न परिस्थितिलाई लिएर धर्मगुरुहरु एकठाउँमा उभिएका छन् । जिल्ला प्रशासन कार्यालय बाँकेमा सोमवार धर्मगुरुहरु सहित बसेको सर्वपक्षीय बैठकले मंगलवार विहान नेपालगन्जमा सामाजिक एवम् धार्मिक सद्भावका लागि र्याली निकाल्ने निर्णय गरेको छ ।

जिल्ला प्रशासन कार्यालयमा सोमवार बसेको सर्वपक्षीय बैठकले नेपालगन्जमा सद्भाव र्याली निकाल्ने निर्णय गर्दै शान्ति, सद्भावमा आँच पुग्ने कुनै किसिमको फोटो, भिडियो, ब्यक्तिगत धारणा, सभा, जुलुस नगर्न–नगराउन अपिल गरेको छ । कुनै धर्म र सम्प्रदायको भावनामाथि ठेस पुग्ने कुनै कार्य नगर्न र समाजमा सामाजिक एवम् धार्मिक सद्भाव कायम राख्ने जारी विज्ञप्तीमा उल्लेख छ ।

सद्भाव र्यालीमा विभिन्न धर्मका गूरु, नागरिक समाजका अगुवा, राजनीतिक दलका नेता, कार्यकर्ता, मानवअधिकारकर्मी, पत्रकार, उद्योगी ब्यवसायीलगायतले सहभागिता जनाउने निर्णय भएको इन्सेक लुम्विनी प्रदेश संयोजक भोला महतले जानकारी दिए ।

मुस्लिम समुदायको मोहरम पर्व सकिए लगत्तै हिन्दुहरुको महान पर्व बडा दसैंको आगमनले नेपालगञ्जमा छुट्टै रौनकता छाईरहेको अवस्थामा कहीँ कतैबाट धार्मिक सदभाव खल्बलिन नदिने धर्मगुरुहरुको भनाई छ । धर्म फरक भए पनि हिन्दु र मुस्लिमले हरेक चाडपर्वमा एक आपसमा सँगै शुभकामना साटासाट गरेर मनाउने गरेको इस्लाम धर्मका धर्मगुरु मौलाना अब्दुल जब्बार मन्जरीले बताए । उनका अनुसार मुस्लिमहरुको ईद पर्वमा हिन्दुहरु पनि सहभागिता जनाउनुका साथै केहीले रोजा पनि बस्ने गरेका छन् भने दशैंमा मुस्लीम धर्मावलम्वीहरुले पनि टिका र जमरा ग्रहण गर्दै आएका छन् ।

धार्मिक सद्भावको शहरको रुपमा परिचित नेपालगञ्जमा धार्मिक सद्भाव अझ बलियो बन्दै गएको अनेकौँ उदाहरण देख्न सकिन्छ । नेपालगञ्ज उपमहानगरपालिका वडा नम्बर ४ का निवर्तमान वडाअध्यक्ष मोहमद सफिक बेहना मुस्लिम भएपनि दशैँमा टिका र जमरा ग्रहण गर्दै आएका छन् । उनी भन्छन् ‘ईदमा हिन्दु साथीहरु मेरो घरमा आउनुहुन्छ, दशैमा म उहाँहरुको घरमा जान्छु, टिका जमरा सबै लगाउँछु ।’

बेहना जस्तै नेपालगञ्ज उद्योग बाणिज्य सँघका निवर्तमान उपाध्यक्ष अवदुल वाहिद मन्सुरी पनि करिव अढाई दुई दशकदेखि दशैंमा टिका र जमरा लगाउँदै आएको बताउँछन् । धार्मिक सद्भावको सन्देश दिनलाई आफूले साथी्को घरमा गएर दशैं तिहार मनाउने गरेको गरेको मन्सुरी बताउँछन् ।

मुस्लिमहरुको मोहर्रम पछि ताजिया विसर्जनका क्रममा हिन्दुहरुले विभिन्न चौकहरुमा पानी खुवाउने गरेको प्रत्यक्ष देख्न सकिन्छ । वडा दसैंमा स्थापना गरिएको नवदूर्गा विसर्जन गर्ने क्रममा पनि हिन्दुहरुलाई बाटोमा सर्वत पानी खुवाएर सहयोग गर्दै आएको बताउँछन् नेपालगञ्जका सलिम मुसलमान ।

चाडपर्वमा अन्तर्घुलनसंगै नेपालगञ्जमा हुने साहित्यिक र सांस्कृतीक कार्यक्रम पनि बहुभाषिक र बहुसाँस्कृतिक हुँदै आएको देख्न सकिन्छ । जसले गर्दा नेपालगञ्जमा धार्मिक र सामाजिक सद्भाव नमुनाकै रुपमा रहेको सन्देश मुलुकभरि गएको बताउँछन् समाजसेवी मोहमद सलिम हल्वाई ।

करिब एक दशकअघि बाँकेमा अन्तर धार्मिक सन्जाल गठन भई सुरु भएको सद्भावको अभियानले अहिले पनि धार्मिक सद्भाव बलियो बनाउन मद्दत गरिरहेको यहाँका धार्मिक अगुवाहरुको ठम्याई छ ।