खोज

बर्दघाट, २६ भदौ । करिब १० महिना पहिले बर्दघाटकी कल्पना अर्यालको करिब ३ तोलाको सुनको सिक्रि बर्दघाटको शुक्रबारे हाटबजारबाट चोरी भयो । तत्काल प्रहरी कार्यालयमा जानकारी गराए पनि प्रहरीले चोरी गर्ने गिरोहको सुइँको समेत पत्ता लगाउन सकेन । अर्यालको सिक्रि चोरी भएको करिब २ महिना पछि पुनः शुक्रबारे हाटबजारमै सिक्रि चोरी गर्दा गर्दै २ बालक (उमेर करिव १२–१३ वर्षका) लाई स्थानीय युवाले रँगेहात पक्राउ गरेर सिक्रि चोरी हुनबाट जोगाएर चोरलाई प्रहरीको जिम्मा लगाए । चोरलाई समातेर प्रहरी कार्यालयमा बुझाए पनि गिरोहको बारेमा केहि पनी पत्ता लगाउन प्रहरी असमर्थ रह्यो ।

गत शुक्रबार बर्दघाटकै सविता आचार्यको सिक्रि चोरी भयो, स्थानीयले चोरी गर्दागर्दै समातेर प्रहरीको जिम्मा लगाए तर प्रहरीले अहिलेसम्म गिरोहसम्म पुग्ने कुनै छेकछन्द नै पाउन सकेको छैन, तर पक्राउ परेका युवाबाट प्रहरीले रु. एक लाख पीडितलाई दिलायो तर न त चोर किटान गर्न सक्यो न त उनी मार्फत गिरोह सम्म पुग्न नै सक्यो । बर्दघाट नगरकै भुताहा हाटबजार, चिसापानी हाटबजारबाट सुनका गहना लुटिएका निवेदन प्रहरी कार्यालयमा पुगे पनि न त गहना भेटिन्छ न त चोरी गर्ने चोर ।

यि केहि प्रतिनिधि घटना मात्र हुन, भिडभाड हुने स्थानमा विशेषगरी महिलाहरूको सुनका गहना लुटिदै गर्दा चोरी गर्ने ब्यक्ति पक्राउ पर्दैनन् र पक्राउ परेकाबाट पनि गिरोहसम्म पुग्न प्रहरी सकेको छैन । बर्दघाट हाटबजार छेवैकी मिना पन्थको करिव २ तोलाको सिक्रि २ वर्ष अघि हाटबजारबाटै हराए पनि उनले प्रहरीमा निवेदन दिइनन् । उनले भनिन ‘चोरी हुनु भइसक्यो, निवेदन दिए पनि पक्राउ पर्ने होइन, किन टाउको दुखाउनु ?’ उनको भनाइ थियो । कार्यालयमा निवदेन नआए पनि विभिन्न माध्यमबाट घटना बाहिर आएपछि प्रहरीले सक्रियता त देखाउँछ तर उपलब्धि भने सुन्य छ । हरेक हप्ताजस्तै चोरी हुँदै आएपनि प्रहरीकोमा चोरी भएको निवेदन भने खासै दिएका हुँदैनन् ।

चोरी गर्दागर्दै पक्राउ परेपनि चोरी गरेको सामान सहित नभेटिँदा कारवाही प्रकृया अघि बढाउन समस्या परेको इलाका प्रहरी कार्यालय बर्दघाटका प्रहरी निरिक्षक भिम कार्कीले बताए । ‘स्थानियको भनाइ अनुसार यिनीहरू समुहमा छन, एउटाले चोरी गर्छ र केहि सेकेण्ड भित्रै एकबाट अर्को गरी त्यहाँबाट फरार भैहाल्ने रहेछन, सँकास्पद पक्राउ त पर्छ तर चोरी गरेको सामान (प्रमाण) नभेटिँदा कारवाही गर्न कठिन हुन्छ ।’ निरिक्षक कार्कीले भने । चाडपर्व नजिकिँदै जाँदा लुटपाट र चोरीका घटना बढन सक्ने आँकलन गरेर इलाका प्रहरी कार्यालयले विभिन्न बजार विकास समिति, उद्योग वाणिज्य सँघ, हाटबजार सँचालक समिति लगायत सरोकारवालाहरूसँग सुरक्षा रणनिती तय गरेको छ ।

बर्दघाट नगरपालिकाले नगरको सुरक्षा गर्ने भन्दै करिव १५ लाख लगानी गरि विभिन्न चोक चौराहामा ५२ वटा सि सि क्यामेरा जडान गरी प्रहरीले निगरानी गरेको छ तर अत्याधिक चोरी हुने क्षेत्र भने सिसि क्यामेराको निगरानीबाट बाहिर छ । बर्दघाट नगरपालिकामा करिव १५ स्थानमा हाटबजार लाग्ने गर्दछ । अत्याधिक चोरी पनि यिनै हाटहरूमा हुने गरेको छ । सि सि क्यामेराले सँवेदनशिल ठाँउहरूको निगरानी गर्दा चोरी, अपराधका घटना कम हुने वा घटेमा अपराधी पत्ता लगाउन सहज हुने भएपनि अत्याधिक भिडभाड हुने हाटबजार क्षेत्रमा भने क्यामेरा जडान भएका छैनन । ‘विभिन्न क्षेत्रमा सिसि क्यामेरा जडान त गरेका छौँ यस वर्षको विनियोजित बजेटबाट प्रहरी प्रशासन सँग समन्वय गरी पहिचान भएका संवेदनशील स्थानहरूमा थप सिसि क्यामेरा जडान गर्ने हो । बर्दघाट नगरपालिकाका योजना प्रमुख पुष्कर काफ्लेले बताए ।

बर्दघाट नगरपालिकामा नगर सुरक्षाको लागि नगर प्रहरी समेत रहेका छन । सिमित नगर प्रहरीले सबैतिर निगरानी गर्न गाह्रो भएपनि हरेक हाट बजारमा कम्तीमा २ जना नगर प्रहरी परिचालित हुने नगर प्रमुख शम्भुलाल श्रेष्ठले बताए । ‘पटक–पटक चोरीका घटना हुनु र चोर पक्राउ गर्न प्रहरी प्रशासन असमर्थ हुँदा आपराधिक सोँच राख्नेको मनोबल उच्च भएकै कारण पटक पटक घटना दोहोरीइरहेका छन । नगर भित्र सञ्चालन हुने साप्ताहिक हाट अब्यवस्थित रहनु, कम्तीमा नगर प्रहरीको निरन्तर निगरानी हुन नसक्नु, सिसि क्यामेराले बजारको निगरानी हुन नसक्दा यस्ता घटना दोहोरीइरहेका छन ।’ बर्दघाट बजार विकास समितिका अध्यक्ष तारा गौतमले बताए । सार्वजनिक स्थानहरूमा समय समयमा घटना घटिरहँदा स्थानीय सरकारले प्रहरी प्रशासन र प्रहरी प्रशासनले स्थानीय सरकारको मुख्य जिम्मेवारी रहने बताउँदै आउने गरेका छन । यसरी एकले अर्कालाई प्रमुख जिम्मेवार ठह¥याउँदा मर्कामा भने जनता पर्ने गरेका छन ।