खोज

बुटवल,२२ फागुन । उद्योग ब्यापार संघ बुटवलले आयोजना गरेको होली मिलन कार्यक्रममा सहभागी उद्योगी व्यवसायीहरु आपसमा रमाएर खुशी साटासाट गर्ने भन्दा चर्को बैंक ब्याज दर, अचाक्ली महंगो र मनोमानी घर भाडा, आर्थिक मन्दी आदि समस्याबारे बढ्ता चिन्तित भए । कोरोना महामारीले थला परेको अर्थतन्त्र चर्को बैंक ब्याज र महंगो घर भाडा लगायत समसयाले झन् धराशायी हुने क्रममा पुगेको र व्यवसायीहरु किस्ता र घरभाडा तिर्न नसकेर पलायन हुनुपरेको पीडाले होली पर्व विगतमा जसरी उल्लासपुर्वक मनाउने वातावरण नभएको संघका अध्यक्ष गोबिन्दराज गैरेले पीडा पोखे । उनले उद्योगी व्यवसायीका साझा समस्या समाधानका लागि सबै निजी षेत्रका संघसंसथाले एकीकृत दवावमूलक कार्यक्रम गर्नुपर्ने बताए ।
नेपाल राष्ट्रिय उद्योग ब्यापार महासंघ लुम्बिनीका कार्यवाहक अध्यक्ष खेम श्रीस, संघका वाणिज्य उपाध्यक्ष लोकनाथ पन्थी, महासचिव पदम जीसी लगायतले घरघाडा ५० प्रतिशत घटाएर व्यवसायीलाई बचाउनुपर्ने अवस्था आएकोमा जोड दिए ।
घरधनीहरुले व्यवसायीबाट चर्को भाडा असुल गरेपनि राजयलाई कर ज्यादै नगण्य मात्र तिरेकाले घर भाडा बटाउनुको विकलप नभएको बताए । वैज्ञानिक घर भाडा कायम गर्न ऐन कानून नै बनाउनुपर्नेमा उनीहरुको जोड थियो ।