खोज

बुटवल, १६ माघ । बुद्ध जन्मस्थल लुम्बिनीमा हुन लागेको रामकथा प्रवचन कार्यक्रम विवादमा परेको छ । लुम्बिनीमा माघ २१ देखि ९ दिनसम्म भारतीय हिन्दु आध्यात्मिक गुरु मोरारी बापुबाट रामकथा प्रवचन गर्ने कार्यक्रमको तयारी भइरहेको छ ।
मारवाडी समुदायका उद्योगी व्यवसायीको अगुवाईमा कार्यक्रमको तयारी भइरहेका बेला बौद्ध धर्मावलम्बीहरुको संस्था धर्मोदय सभाले उक्त कार्यक्रम रोक्न माग गरेको हो ।
बुद्ध जन्मस्थल लुम्बिनी बौद्धमार्गीहरुको पवित्र र सम्मानित स्थल भएकाले गैर बौद्ध धर्मावलम्बी कार्य सञ्चालन षड्यन्त्र भएको भन्दै कुनै हालतमा गर्न दिन नहुने धर्मोदय सभाको माग छ ।
सबै धर्मावलम्बीको आआफ्नो क्षेत्र हुंदाहुंदै बुद्धको पवित्र भूमिमा गैर बौद्ध कार्यक्रम सञ्चालन गर्नुको पछाडि कुनै षड्यन्त्र लुकेको आभाष मिलेको धर्मोदय सभाका महासचिव सागरमान बज्राचार्यले निकालेको विज्ञप्तिमा उल्लेख छ । बौद्ध धर्मावलम्बीको सम्मानित क्षेत्रमा हस्पक्षेप गर्न लागेको क्रियाकलाप तुरुन्त बन्द गर्न लुम्बिनी विकास कोषसंग सभाले माग गरेको छ ।
केही समय अघि लुम्बिनीमै हिन्दु–बौद्ध सम्मेलन आयोजना गर्न खोजिएकोमा त्यसलाई पनि धर्मोदय सभाले प्रतिकार गरेर रोकेको बज्राचार्यले बताए ।

लुम्बिनी विकास कोषका सदस्य सचिव सानुराजा शाक्यले प्रवचन रोक्न माग गरेको विषय आफूले पनि थाहा पाएको तर भेटेर औपचारिकरुपमा कुराकानी नभएको बताए ।
उनले यो कार्यक्रम हिन्दु धर्मको प्रचारका लागि नभएको र बौद्ध कथा पनि प्रवचन हुने भन्दै यसको विरोध गर्नु पर्ने कारण नभएको बताए ।
राम कथा प्रेम यज्ञ समिति लुम्बिनीका संयोजक राजेश कुमार अग्रवालले यो प्रवचन कार्यक्रम लुम्बिनीलाई विश्वसामु परिचित गराउन सहयोग गर्ने र लुम्बिनीको पर्यटन प्रवद्र्धनमा टेवा पु¥याउने बताए ।
होटल संघ लुम्बिनीका अध्यक्ष गोविन्द ज्ञवालीले थला परेको लुम्बिनीको पर्यटनलाई राम कथा प्रवचनले राहत दिने अपेक्षा गरिएकोमा कार्यक्रमको विरोधले होटेल व्यवसायीहरु निराश भएको बताए ।