खोज

तिलोत्तमा, ३० पुस । आगामी फेब्रुअरी १३ र १४ गते काठमाडौंमा हुने एशियन मार्शलआर्ट च्याम्पियनसीपमा सहभागी हुने रुपन्देहीका तेक्वान्दो खेलाडीहरु छनोट भएका छन् ।
नेपाल योङ ब्रदर्स तेक्वान्दो क्लब रुपन्देहीको आयोजनामा शनिबार तिलोत्तमामा रुपन्देही जिल्लास्तरीय छनोट प्रतियोगिताबाट ५१ जना खेलाडी छनोट भएका हुन् ।
पुरुष र महिलातर्फ १६–२२ केजीदेखि ६४ केजीमाथिसम्मका ८–८ वटा तौल समूहमा भएको प्रतिस्पर्धाबाट प्रत्येक तौल समूहबाट ३ जनाका दरले ५१ जना खेलाडी छनोट भएका हुन् ।

खेलाडी छनोट प्रतियोगिताको उद्घाटन गर्दै क्लबका प्रमुख सल्लाहकार एवं लुम्बिनी प्रदेश योजना आयोगका पुर्व सदस्य डा. दामोदर भुसालले कुनैपनि खेलकुद प्रतियोगिता खेलाडीका लागि नभई राष्ट्रका लागि हुने बताए । खेलको माध्यमबाट देशलाई अन्तर्राष्ट्रियस्तरमा चिनाउन सकिने र स्वास्थ्य, अनुशासन तथा राष्ट्रिय एकताको भावना विकास हुने डा. भुसालले बताए । नेपालका राजनीतिक दलका नेताहरुले खेलाडीबाट देशप्रेम,लक्ष्य प्राप्ति र अनुशासन सिक्नुपर्ने भन्दै उनले खेलकुदको विकास र खेलाडीको प्रोत्साहनका लागि तीन वटै तहका सरकारले लगानी बढाउनुपर्ने बताए ।
कार्यक्रममा निलगिरी चिल्ड्रेन्स बोर्डिङ स्कुलका प्रिन्सिपल मिना देउजा केसी, वडा सदस्य विष्णुकुमारी अधिकारी चौधरी,क्लबका अध्यक्ष संघर्ष श्रेष्ठ,सचिव बोम बुढामगर लगायतले विद्यालय तहबाटै खेलाडी उत्पादनमा सरोकारवालाको ध्यान जानुपर्ने बताए ।
३ वर्षअघि स्थापना भएको क्लबमा २ सय खेलाडी आवद्ध रहेका र तिलोत्तमामा, बुटवल र सैनमैनामा २–२ वटा गरी ६ वटा डोजाङ रहेका अध्यक्ष संघर्ष श्रेष्ठले बताए ।

छनोट प्रतियोगितामा संघर्ष श्रेष्ठ,योगेन्द्र श्रेष्ठ,बोम बुढा,सुशान्त पाण्डे लगायत रेफ्री रहेका थिए । क्लबले यसअघि विभिन्न राष्ट्रिय र अन्तर्राष्ट्रिय प्रतियोगितामा भाग लिएको र बागलुङमा गत असोजमा सम्पन्न प्रोफेसनल च्याम्पियनसीपमा रश्मी ठाडामगरले दोस्रो स्थान हासिल गरेकी थिइन् ।