खोज

बुटवल, ५ मंसिर । बहराइनको मानामामा शुरु भएको डेभिस कप टेनिस प्रतियोगिता (एसिया/ओसियाना क्षेत्र) मा नेपाली खेलाडीहरुले विजयी शुरुवात गरेका छन । मंगलबार भएको पहिलो खेलमा नेपालका प्रदिप खड्काले गुआमका लियरेन्स ड्यनियललाई ६–२, ६–२ को सोझो सेटमा पराजित गरेका छन ।

यसैगरि अर्को खेलमा नेपालकै अभिषेक बास्तोलाले गुआमका देरेक उकुहामालाइ ६–१, ६–१ को सोझो सेटमा पराजित गरे । डवल्समा भने गुआमले सान्त्वना जित निकाल्यो । मंगलबारको सबै खेल सकिदा नेपाल २–१ ले विजयी भएको छ ।

नेपालले अब हुने ब्रुनाईसंगको खेलमा जित निकाल्न सके सेमीफाईनल पुग्ने टिम व्यवस्थापक गोपालप्रसाद ज्ञवालीले बताए । ‘योसंगै नेपालको रेकिङ समेत बढ्ने भएको छ ।’— उनले भने । टिम स्पर्धामा २ सिंगल्स र १ डबल्स खेल हुनेछ । टेनिसको ठूलो प्रतियोगिताको रूपमा रहेको डेभिस कपमा नेपालले दोस्रोपल्ट भाग लिएको हो । नेपाली खेलाडी अभिषेक बाँस्तोला, प्रदीप खड्का, प्रणव खनाल, प्रणव मानन्धर र रितिक राना छन । टोलीका प्रशिक्षकमा शरद् लामा र व्यवस्थापकमा रूपन्देही जिल्ला टेनिस संघका अध्यक्ष गोपालप्रसाद ज्ञवाली छन् ।

प्रतियोगितामा नेपालसहित आयोजक बहराइन, बंगलादेश, भुटान, ब्रुनाई, लाओस, ग्वाम, मकाउ, माल्दिभ्स, मंगोलिया, नर्दन मारियाना आइल्यान्ड, फिलिपिन्स, ताजकिस्तान, तुर्कमेनिस्तान र यमन गरि १५ राष्ट्र सहभागी भएका छन् ।