खोज

बुटवल, ४ मंसिर । तेस्रो अन्तर विद्यालय जिल्ला स्तरीय लुम्बिनी कप कराते प्रतियोगिता २०८१ को उपाधि दीप बोर्डिङ स्कुलले चुमेको छ । बुटवल उपमहानगरपालिकाको सहयोगमा नेपाल सितोरिया कराते संघ, रुपन्देहीले आयोजना गरेको प्रतियोगितामा शनिबार भएको फाईनल खेलमा ६ स्वर्ण, ३ रजत र ३ कास्य पदक जित्दै दीप बोर्डिङ टिम च्याम्पियन भएको हो ।

प्रतियोगितामा न्यु होराईजन ईगलिस बोर्डिङ स्कुलले ४ स्वर्ण, ३ रजत र ३ कास्य जित्दै दोस्रो तथा सैनामैनाको लिटिल रोज ईगलिस बोर्डिङ स्कुल ३ स्वर्ण, ३ कास्य जित्दै तेस्रो भएको छ ।

कार्यक्रममा बुटवल उपमहानगरपालिकाका नगरप्रमुख खेलराज पाण्डेय, न्यु होराईजन बोर्डिङ स्कुलका प्राचार्य लोकनाथ उपाध्याय, नगर खेलकुद विकास समितिका संयोजक बोनिन पिया, संघका अध्यक्ष नारायण थापाले विजेता, उपविजेता टिम तथा उत्कृष्ट खेलाडीहरुलाई पुरस्कृत गरेका थिए ।

कार्यक्रममा भुटानमा सम्पन्न आठौ दक्षिण एशियाली कराते प्रतियोगितासहित विभिन्न प्रतियोगितामा पदक विजेता रोनिस्का न्यौपानेलाई उदयमान खेलाडी, जिल्ला खेलकुद विकास समिति रुपन्देहीको प्रशिक्षक रही समग्र कराते खेलको वृद्धि, विकासमा निरन्तर योगदान दिएका एकेएफ रेफ्री माधव घिमिरे, अग्रज प्रशिक्षक अमिर राई, एकेएफ प्रशिक्षक उमेश थापालाई दोसल्ला र सम्मानपत्रबाट सम्मान गरिएको छ ।
प्रतियोगितामा २८ विद्यालयका २ सय ५० बढी खेलाडीहरुले भाग लिएका थिए ।