खोज

बुटवल,२५ पुस । सरकारको गलत नीतिका कारण धराशायी हुने अवस्थामा पुगेको उद्योगी व्यवसायीहरुले गुनासो गरेका छन् । नेपाल राष्ट्र बैंकले चालु पूँजी कर्जा सम्बन्धी मार्गदर्शन संशोधन गरेपनि त्यो अल्पकालीन र अधुरो रहेकाले निजी क्षेत्रले राहत महसुस गर्न नसकेको उनीहरुको गुनासो छ ।

उद्योग व्यापार संघ बुटवलको चौथो वार्षिक साधारणसभाको उद्घाटन गर्दै बुटवल उपमहानगरपालिकाका प्रमुख खेलराज पाण्डेले कोरोना महामारीले थला परेको अर्थतन्त्र आर्थिक मन्दीका कारण झनै संकटतिर धकेलिएको भन्दै सरकार र निजी क्षेत्र मिलेर समाधान खोज्नुपर्ने बताए ।

उनले स्थानीय सरकारबाट हुन सक्ने सहजिकरण र सहयोगका लागि उपमहानगरपालिका सधै तयार रहेको बताए । बुटवलमा निर्माणको प्रकृयामा रहेको मोतिपुर औद्योगिक क्षेत्रलाई छिटो कार्यान्वयनमा ल्याउन सके उद्योगीलाई राहत उद्योगी व्यवसायीले पनि सरकारलाई झक्झकाउन नगर प्रमुख पाण्डेयले आग्रह गरे ।

नेपाल उद्योग ब्यापार महासंघका केन्द्रीय महासचिव एवं उद्योग व्यापार संघ बुटवलका संस्थापक अध्यक्ष खिमनारायण पराजुलीले चालु पुंजी कर्जा मार्गदर्शन पुनः संशोधन गरेर उद्योगी व्यवसायीका माग सम्बोधन हुनुपर्ने बताए । उनले बैंकहरुले गरेको कुल ऋण लगानीको ६० प्रतिशत हिस्सा ९६ जना ठुला घरानाका ऋणीमा रहेको र बांकी ४० प्रतिशत १८ लाख ऋणीमा रहेकाले अर्थतन्त्र सीमित व्यक्तिका कारण संकटमा परेको बताए ।

उद्योग ब्यापार संघ बुटवलका अध्यक्ष गोबिन्द गैरेले बुटवलका ४ वटा मुख्य व्यवसायिक संस्था मध्ये कान्छो भए पनि आफ्नो संस्थाले अरु संस्था सरह सामाजिक क्षेत्रमा काम गरेको र चारवटा औद्योगिक ब्यापार मेला सफलतापुकर्वक सम्पन्न गरेको बताए । उनले आउंदो २०८२ सालको पुसमा संघले औद्योगिक बयापार मेला गर्ने गरी संस्था अघि बढेको बताए । उनले स.स्थाको भवन निर्माणका लागि बुटवल उपमहानगरले जग्गा उपलब्ध गराएकोमा उपमहानगरलाई धन्यवाद ज्ञापन गरे ।

कार्यक्रममा रुपन्देहीका प्रमुख जिल्ला अधिकारी भरतमिण पाण्डे,बुटवल उपमहानगरपालिकाकी उपप्रमुख सावित्रा अर्याल,बुटवल उपमहानगरपालिका प्रमुख प्रशासकीय अधिकृत टेकराज पन्थी, लुम्बिनी प्रदेश उद्योग परिसंघका अध्यक्ष एजाज आलम,  नेपाली कांग्रेस बुटवल उपसभापति ज्योति भण्डारी, उद्योग वाणिज्य संघ बुटवलका अध्यक्ष उज्ज्वल कसजु,नेकपा माओवादी केन्द्रका बुटवल इन्चार्ज पुष्पराज ढकाल,नेकपा एमाले बुटवल इन्चार्ज किसन ज्ञवाली,नेपाल राष्ट्र बैंक सिद्धार्थनगरकी व्यवस्थापक रन्जना पौडेल, उद्योग ब्यापार संघ बुटवलका उद्योग उपाधयक्ष विष्णुप्रसाद पाण्डे,वाणिज्य उपाध्यक्ष लोकनाथ पन्थी,महासचिव पदम जीसी,कोषाध्यक्ष अन्जु पाण्डे लगायतले चर्को घरभाडाका कारण पनि उद्योगी व्यवसायी मर्कामा परेकाले वैज्ञानिक भाडा दर निर्धारण गर्न र व्यवसायलाई आधुनिक, उपभोक्तामैत्री बनाउनुपर्नेमा जोड दिए ।