खोज

गुल्मी, १९ पुस । नागरिकको सेवा प्रवाह कार्यालयवाटै हुनुपर्दछ भन्ने छैन । यदि जन प्रतिनिधिले नागरिकको गुनासो सुन्न र उनीहरुलाई सहज रुपमा सेवा प्रवाह गर्नका लागि कहिले काहिँ उनीहरुको घर आँगनसम्म पनि पुग्नु पर्दछ । आफ्नै घर आँगनमा आफुले निर्वाचित गरेका जनप्रतिनिधिहरु पुग्दाको खुसि नागरिकहरुमा झनै गहिरो बन्ने गर्दछ ।
नागरिकका यस्तै आशा र उनीहरुको समस्यालाई बुझ्ने प्रयास गर्दै छ गुल्मीको गुल्मीदरबार गाउँपालिका । जहाँ नागरिक त्यहाँ सेवा भन्ने मान्यतालाई आत्मसाथ गर्दै उक्त पालिकाले एकीकृत घुम्ती सेवा मार्फत वडामै पुगेर नागरिकलाई सेवा प्रवाह गर्न शुरु गरेको छ । कार्यालयको कामकाजलाई व्यवस्थीत गर्दै वडा वडामा पुगेर घुम्ती सेवा मार्फत नागरिकलाई सेवा प्रवाहसँगै उनीहरुका जनगुनासाहरुलाई समेत सोही ठाउँवाट समाधान गर्ने प्रयास गरेको पालिका अध्यक्ष सरोज कुमार थापाले बताए ।
यसरी पालिकाले वडा तहमै पुगेर सेवा प्रवाह गर्न थालेपछि स्थानीयहरु पनि निकै खुसी बनेका छन । यसरी वडाबाट नै सेवा पाउँदा अत्यन्तै खुसी लागेको वडा नं –१ बलीथुमका स्थानीय दिलबहादुर कुमालले बताए । एउटा कुनै सानो कामले पालिकामा जानु पर्दा घण्टौं समय लाग्ने गरेको भन्दै यनले यसरी गाउँमै आएर सेवा दिंदा निकै खुसि लागेको बताए ।
गुल्मीदरबार गाउँपालिकाले वडामै पुगेर विभिन्न विषयगत कार्यालयका फरक फरक विधाका शिर्षकहरुमा कुल तीन हजार तीन सय ८३ जना नागरिकलाई सेवा प्रवाह गरेको प्रमुख प्रशासकीय अधिकृत लक्ष्मण पाण्डेले बताएका छन् । पालिकाले गत दुई गर्षदेखि एकिकृत घुम्टी सेवा संचालन गर्दै आएको पाण्डेले बताए ।
योजना सम्झौता गर्नु पहिले र सम्झौता गरेपछि पालिकाले सबै वडा तहसम्म पुगेर स्थानीय उपभोक्ता समितिका पदाधिकारीसँग अभिमुखिकरण कार्यक्रम समेत संचालन गर्ने गर्दछ । योजना सम्पन्न गर्न र गरेपछि त्यसको भुक्तानी प्रकृयासम्म आवश्यक पर्ने सबै विषय वस्तुहरुको बारेमा उपभोक्ताहरुलाई जानकारी गराईन्छ ।
एकिकृत सेवा मार्फत पालिकाले नयाँ व्यवसाय दर्ता, व्यवसायको नवीकरण, माटो परीक्षण, पशुपन्छी औषधी वितरण तथा परामर्श, स्वास्थ्य परीक्षण तथा औषधी वितरण,जेष्ठ नागरिक परिचय पत्र वितरण लगायतका सेवा प्रवाह गरेको गाउँपालिका उपाध्यक्ष तारा थापाले जानकारी दिएकी छन । पालिकाले नागरिकलाई सहज रुपमा सेवा प्रवाह गर्दै उनीहरुमा अभिभावकीय अपनत्व प्रदान गर्न जनतासँग गाउँपालिका र जनतासँग अध्यक्ष लगायतका कार्यक्रम समेत सञ्चालन गर्दै आईरहेको थापाले बताइन् ।