खोज

बुटवल,१६ पुस । आइतबार देखि अंग्रेजी नयां वर्ष २०२३ शुरु हुँदै छ । हरेक वर्ष अंग्रेजी महिना जनवरी १ लाई नयां वर्ष शुरुवात भएको मान्न्छि ।

अंग्रेजी नयां वर्षलाई नेपालीहरुले पनि विभिन्न सांगीतिक कार्यक्रम गरेर मनाउने प्रचलन रहेको छ । खासगरी पर्यटनंसंग सम्बन्धित होटेल तथा रेष्टुरेन्ट, टुर एण्ड ट्राभल व्यवसायीहरुले विदेशी पर्यटकलाई आकर्षित गर्न नयां वर्षमा विविध कार्यक्रम गर्दै आएका छन् ।

यस वर्ष पनि बुटवल क्षेत्रमा होटेल तथा रेष्टुरेन्ट व्यवसायीले अंग्रेजी नयां वर्षको अवसरमा तीन दिने सडक खाना महोत्सव सञ्चालन गरेका छन् ।

यस्तै होटेल पौवाले बुटवल, भैरहवा र घोराहीमा पुस १६ गते साँझ ६ बजेबाट सांस्कृतिक कार्यक्रम सहित नयां वर्ष मनाउने तयारी पुरा भएको होटेलका विष्णु भण्डारीले बताए । सागितिक कार्यक्रममा प्रवेश निःशुल्क गरिएको छ । बुटवलमा प्रकाश दुधराज, मिलन नेवार, खुमन अधिकारी र गायक अफसर अलिको प्रस्तुति रहने छ ।

यसैगरी भैरहवामा नेपाल आईडल प्रविण वेडवाल र एन्जिला रेग्मी, कर्णराज गिरिको प्रस्तुति रहने छ भने घोराहीमा नेपाल आईडलका अमित बरालको ब्याण्डको प्रस्तुति रहने उनले बताए ।

यस्तै चन्द्रौटाको सिद्धार्थ लुम्बिनी ग्रीन रिसोर्टमा पनि हेमन्त शर्मा लगायतका कलाकारको प्रस्तुतिमा सांगीतिक कार्यक्रम रहेको अपरेसन मयानेजर राजकुमार केसीले बताए ।
यस्तै अन्य होटेल र रेष्टुरेन्टहरुले पनि कलाकारको प्रस्तुतिमा नयां वर्षलाई उल्लासमय बनाउन कार्यक्रम आयोजना गरेका छन् ।