खोज

बुटवल, १२ पुस । वहुचर्चित निर्मला कुर्मी अपहरण तथा हत्याकाण्डका मुख्य अभियुक्त ठहर भएका बाँके क्षेत्र नं. ३ प्रदेशसभा (क) का कांग्रेस सांसद बादशाह कुर्मीको सपथ रोक्न महिला अधिकारकर्मीले माग गरेका छन् ।
बांकेको नेपालगञ्ज–१७ की एकल महिला निर्मला कुर्मीको अपहरण, शरीर बन्धक र कर्तब्य ज्यान मुद्दामा दोषी ठहर भएकाले उनको सपथ रोक्न महिला अधिकार मञ्च बांकेले लुम्बिनी प्रदेश प्रमुख अमिक शेरचनलाई ज्ञापनपत्र बुझाएको हो ।
सपथ रोक्न माग गरिएको विषय निर्वाचन आयोग,न्याय परिषद सचिवालय,राष्ट्रिय मानव अधिकार आयोग र राष्ट्रिय महिला आयोगलाई बोधार्थ पठाइएको मञ्चकी केन्द्रीय सदस्य मनकुमारी गुरतालले बताइन् ।
यसअघि मञ्चले कुर्मीको उम्मेदवारी खारेज गर्न निर्वाचन आयोगमा निवेदन दिएको थियो ।
गम्भीर खाले महिला हिंसा र अपराधमा संलग्न व्यक्ति चुनाव लड््न नमिल्नेमा सत्ताको आडमा कुर्मी चुनाव लडेर जितेपनि पीडितलाई न्याय दिन उनको सपथ रोकिनुपर्ने माग गर्दै प्रदेश प्रमुखलाई ज्ञापनपत्र बुझाएको अधिकारकर्मी रुबि खानले बताइन् ।
उक्त घटनामा सांसद कुर्मीसहित ८ जनाविरुद्ध २०७७ चैत २० गते जाहेरी परेपछि जिल्ला अदालतले पक्राउ पुर्जीसमेत जारी गरेको थियो । महिलाको संवेदनशिल मुद्दामा सम्बन्धित निकायको लापरवाही र मिलेमतोले मुद्दालाई न्यायालयसम्म नपु¥याउने चलखेल देखिएको भन्दै महिला अधिकार मञ्चले १९ दिन जिल्ला प्रशासन कार्यालयमा धर्ना दिएको थियो । त्यसपछि पनि सुनुवाइ नभएपछि असोज २०७८ देखि २० दिन पैदल हिँडेर काठमाडौं पुगेर धर्ना दिएको थियो ।
२०७८ कात्तिक २ गते भएको वार्तामा गृहमन्त्रालयले ७ सदस्यीय छानवीन समिति गठन गरेको थियो । उक्त समितिले कुर्मीलाई मुख्य दोषी ठहर गर्दै तत्कालीन गृहमन्त्री बालकृष्ण खांणलाई कात्तिक १४ गते प्रतिवेदन बुझाएको थियो । तर गृह मन्त्रालयले दोषीलाई कारवाही गर्न आलटाल गरेपछि महिला अधिकारकर्मीहरु पुनः आन्दोलित भएका थिए । उक्त घटनाको सीआईबीले अनुसन्धान गरिरहेको छ ।