खोज

बुटवल, १ पुस । स्थानिय पर्यटकलाई आकर्षण गर्ने र पर्यटन प्रवद्र्घन उद्देश्यका साथ पुस २ गते वृहत पदयात्रा हुने भएको छ । ‘पर्यटनका लागि हामी, हाम्रो स्वस्थ्य र पदयात्रा’ नारासहित नेपाल एसोसियसन अफ टुर एण्ड ट्राभल (नाटा) लुम्बिनीको आयोजनामा पहिलोपटक बुटवल मणिमुकुन्द उद्यानदेखि नुवाकोटसम्मको साढे ३ किलोमिटर वृहत पदयात्रा गर्ने भएको हो ।
शुक्रबार बुटवलमा पत्रकार सम्मेलन गरि एक दिने वृहत पदयात्राको तयारी पुरा भएको नाटाका अध्यक्ष रचना पन्तले बताईन । आन्तरिक र बाह्य पर्यटकलाई समेत धार्मिक, सांस्कृतिक, पर्यटकिय क्षेत्रहरु चिनाउन कार्यक्रम उपयोगी हुने उनले बताईन । ‘बिहान साढे ६ बजे बुटवल मणिमुकुन्द सेन उद्यानबाट कार्यक्रम शुरु हुने छ ’– उनले भनिन् । सामरिक महत्व बोकेको नुवाकोटगढी, भैरव मन्दिरसंगै पछिल्लो समयमा सो क्षेत्रमा प्रदेश सरकारको लगानीमा सांस्कृतिक डबली तयार भएको छ । यसैगरि नीजि क्षेत्रको लगानीमा केवलकार संचालनको अन्तिम तयारीमा रहेको छ । यस्ता सबै पर्यटन पुर्वाधारहरु समेत अवलोकन कार्यक्रममा हुने उनले बताईन । कार्यक्रममा विभिन्न सरोकारवाला संस्थाहरुका करिब ३ सय जनाको सहभागिता रहने उनले बताईन । फुलबारी देखि नुवाकोट साढे ३ र फर्कदा साढे ३ गरि कुल ७ किलोमिटरको दुरिको यात्रामा सहभागीलाई टिसर्ट, पिउने पानी, नास्ता, खानाको ब्यवस्थापन विभिन्न सरकारी तथा संघसंस्थाहरुबाट गरिने उनले बताईन् । पदयात्रा संगै सरसफाईको अभियानलाई समेत जोडेको उनले बताईन । ‘हामीले फर्कंदा बाटामा भेटिएका फोहोरहरु संकलन गरि ब्यवस्थापन गर्ने छौ’– उनले भनिन् । पर्यटकहरुलाई सरसफाईप्रति सचेत बनाउन जरुरी रहेको उनले बताइन् ।
लुम्बिनी प्रदेश पर्यटन परिषद, लुम्बिनी प्रदेश पर्यटन बोर्डको सहकार्यमा बुटवलदेखि नजिककै रहेको पर्यटकिय स्थलको प्रचारप्रसार र पर्यटन प्रवद्र्धन हुने गरि कार्यक्रम गरिएको संयोजक गणेश भट्टराईले बताए । एक दिनको कार्यक्रममा भैरवस्थान मन्दिर र साइड हेर्ने, फोटोसेसन गर्ने लगायतका कार्यक्रम हुने छन् ।